Island-ip Kalaallit Nunaatalu akornanni suleqatigiinneq nukittunerusoq

Nordiske flag

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup, Vittus Qujaukitsup maajip arfernanni oqarasuaatikkut majip arfernani ataatsimiinnermi Lilja Alfreðsdóttir-ip Islandimi nunanut allanut ministerinngorneranut atatillugu pilluaqquaa.

Oqarasuaatikkut ataatsimiinnermi nunat taakku marluk suleqatigiinnikkut killiffik ministerit eqqartorpaat, tassanilu pineqarput Islandip Kalaallit Nunaatalu ataatsimoorussamik nalunaarutaat november 2013-imeersoq aalisarnermut, peqqissutsimut, takornariaqarnermut, niuernermut inuussutissalerinermullu suleqatigiinnissamut toqqammaviusoq.

Silaannakkut angallanneq pillugu kalaallinik/islandimiunik suleqatigiissitamik pilersitsinissaq pillugu suliniutit aalajangersimasut pingasut Ministerit naammagisimaarinnillutik isumaqatigiissutigivaat. Suleqatigiissitaq mittarfinnik atorluaanissamut silaannarmilu angallannermi pitsanngorsaanissamut isumannaallisaanissamullu suleqatigiiffiusinnaasunik periarfissarsiussaaq.

Suliniutip aalajangersimasup aappaa tassaavoq kalaallit nerisassaataat akitsuusersornagit Island-imut eqqussigallarnissamut aaqqissuussaq, tamanna kalaallit Islandimiikkallartarnerannut sivisuumik ajornartorsiutaasimavoq. Islandimi oqartussaasut ajornartorsiut sukumiisumik misissuiffigereerlugu Kalaallit Nunaannit akunnikkallartunut aaqqiissutissamik nassaarsimapput.

Naggasiullugu Kalaallit Nunaata Islandillu akornanni nerisassanik eqqussuisarnermut malittarisassanut paasititsiniutinik quppersagaaqqanik sanasoqarnissaaisumaqatigiissutigineqarpoq. Quppersagaaraq kalaallisut, islandimiusut qallunaatullu saqqummersinneqarnissaa pilersaarutaavoq, taakkulu Islandip Kalaallit nunaatalu akornanni angalasunit tamani pissarsiarineqarsinnaassalluni.  

Ataatsimiinneq naggaserlugu ministerit suleqatigiinnermi tatigeqatigiiginnarnissaq, Kalaallit Nunaannut Islandimullu iluaqutaasussamik ilisimasanik avitseqatigiittarnissamut periarfissiisoq, qulakkeerpaat. Nunat taakku marluk soqutigisaat amerlasuutigut assigiiffeqarput qaninnerusumillu suleqatigiikkusupput, aamma issittumiinnermut atatillugu Islandip Kalaallit Nunaatalu suleqatigiinnerunikkut nunarsuarmi sumiiffeqatigiinnermik atorluaanissamut nukittunerulersinnaallugu. Taassuma saniatigut niuernikkut suleqatigiinnerup annertusarneratigut Islandimi Kalaallit Nunaannilu alliartortitsisinnaavoq suliffissaqartitsinerulerlunilu, tamannaavorlu nunat taakku marluullutik siunissami suleqatigiilluarlutik annertunerpaamik pissarsiffiginiarfigisinnaasaat.

Suleqatigiinnerup ulluinnarni ataqatigiissaarneqarnera Nunanut Allanut Pisortaqarfiup suliarissavaa.

 

Paasisaqarnerorusukkuit Immikkut siunnersorti Pernille Bengtsen attavigiuk, oqarasuaat 34 51 61.