Kalaallit Nunaanniit inuit nuttarput – sooruna?

- Pissuseq taanna paasiniaaffiginiarlugu Aningaasaqarnermut Naalakkersuisoqarfik misissuinermik aallartitsivoq

”Ukiut 20-t ingerlaneranni innuttaasut aatsaat taama ikitsigipput”. Naatsorsueqqissaartarfiup februar 2016-imi saqqummersitaani, innuttaasut amerlassusiisa allanngoriartornerannik sammisaqartumi, inerniliineq taamaappoq. Ullumikkut innuttaasut 56.000-init ikinneruvugut, siunissarlu eqqarsaatigalugu amerlassutsip allanngoriartornera missiliussagaanni, suli aarlerinartoqarneruvoq. Kalaallit Nunaanni Aningaasaqarnikkut Siunnersuisoqatigiit 2015-imi nalunaarusiaat naapertorlugu, 2040-mi innuttaasut 52.000-it ataatissagai naatsorsuutigineqarpoq (nalunaarusiami qupp. 27). Malunnartumik ikiliartorneruvoq.

Naatsorsueqqissaartarfiup kisitsisaatai naapertorlugit, innuttaasut Kalaallit Nunaanni inunngornikut taakkuupput nunatsinnit avalattartut. Kiisalu pissutsit takutippaat, eqimattat taakku nunarput sukkanerusumik qimattaraat. Tamanna ajornartorsiutaavoq, avalattartulli ilaasa qaffasissumik ilinniagaqartuunerat peqqutigalugu, ajornartorsiut suli anneruvoq. 

Aningaasaqarnermullu Naalakkersuisoqarfiup innuttaasunik ataatsimiitsitsinerani tallimani Tasiilami, Sisimiuni, Ilulissani, Nuummi Qaqortumilu ingerlanneqartuni, ineriartorneq nuanniitsoq ersersinneqaqqiinnarpoq. Tamatumani innuttaasut 100-t pallillugit takkussimasut, oqaaseqaatit arlallit pillugit isumaat pillugit aperineqarsimapput. Oqaaseqaatit ilaat tassaavoq, ”Nuunniarlutit eqqarsaruit, sumut nuunnissat eqqarsaatiginerusarpiuk?”. Takkussimasut 27 procentiisa missaat, akisimapput nunamut allamut nuunnissaq eqqarsaatiginerusarlugu. Eqqaaneqassaaq, misissuineq ilisimatusarnikkut misissuinerunngimmat, innuttaasulli amerlasuut maannakkut imaluunniit siunissami qanittumi Kalaallit Nunaannit nuunnissartik isumaliutersuutigisaraat, kisitsisinit takutinneqarnera aarlerinartoqarpoq.

”Ajornartorsiut Naalakkersuisut nakkutigisorujussuuaat, ineriartorneralu pimoorulluinnarparput. Ineriartornermi ingerlaannarpat, anguniagarpassuatta piviusunngortinnissaat ajornakusoorsinnaammat”, taama oqarpoq Randi Vestergaard Evaldsen, Aningaasaqarnermut Aatsitassanullu Naalakkersuisoq, ilisimatitsissutigalugulu, Kalaallit Nunaannit nuttarnerup annertusiartortup tunngavii paasiniarlugit Naalakkersuisut misissuillutik aallartereersimasut.

Misissuinerit naammassippata, Kalaallit Nunaannit nuttarnerup tunngavia ersarinnerusumik paasisaqarfigissavarput. Taamaasillutalu, ineriartornerup allanngortinneqarnissaa anguniarlugu, suliniutit suut aallartinneqassanersut ersarinnerusumik paasissavarput.

Siusinnerusukkut misissuinerit takutinnikuuaat, inuit nuttarnerannut suut pissutaasartut. Suliffiit pitsaanerusut kiisalu ilinniarfissat pitsaanerusut pissutaanerpaasarsimapput. Ullumikkut aamma tamakku pissutaanersut imaluunniit allanik pissuteqarnersoq, apeqqutit akisassat atorlugit misissuinerup takutissavaa.

Misissuinermi inernerit 2016-imut Nuna tamakkerlugu pilersaarusiamut nassuiaatip suliarinerani ilanngunneqassapput.

Paasissutissat: Apeqqutit akisassat atorlugit misissuineq

Innuttaasut tamarmik apeqqutit akisassat atorlugit misissuinermut peqataasinnaapput. Misissuineq tallimanngorneq 6. maaji 2016-imit sapaat 22. maaji 2016-ip tungaanut ingerlassaaq. Apeqqutit akisassat nittartakkami uani nassaarineqarsinnaapput: http://nuuttarneq.gl imaluunniit http://flytning.gl. Apeqqutit akisassat kalaallisut, danskisut imaluunniit tuluttut akineqarsinnaapput. Nuussimagaanni imaluunniit nuussimanngikkaanni, Naalakkersuisut kajumissaarutigissavaat, apeqqutit akisassat 10 minutsit atorlugit akineqaqqullugit. Tamatta ikioqatigiinnitsigut, nunatsinnut tamarmut pilersaarusiornermut iluaqutaasussanik ilisimasanik nutaanik Naalakkersuisut pissarsitissinnaavagut.

Inussiarnersumik Inuulluaqqusillunga

Randi Vestergaard Evaldsen
Aningaasaqarnermut Aatsitassanullu Naalakkersuisoq

Attavigiuk: Tusagassiinermi ataqatigiissaarisoq Martin Christiansen, telefon: +299 221533