Halibut Greenland

Halibut Greenland inuiaqatigiinni akisussaaqataanerminik ersersitsivoq 2015-imut naatsorsuutitsigut naammaginarluartutigut.

Vittus Qujaukitsoq Halibut Greenland ApS -imut pilluaqqusivoq, 2015-imi naatsorsuutini angusaanut pitsassuarnut tunngatillugu, nuannaarutigalugillu ingerlatseqatigiiffiup inuiaqatigiinnut kalaallinut tunniussai kaaviaartitat suliniutillu qaffakkiartortut eqqarsaatigalugit.

Ingerlatseqatigiiffiup ukiumoortumik naatsorsuutimini kaaviaartitat 201 mio. kr.-it angusarai, akileraarutillu sioqqullugit sinneqartoorutit 30,4 mio. kr.-it, ukiumut siulianut sanilliullugu marloriaat sinnerlugu. Ingerlatseqatigiiffiup 96,8 mio. kr.-it aalisartuniit nioqqutissiassanik pisiortornerminut il.il. aningaasartuutigisimavai. Tamatumunngalu tunngatillugu Vittus Qujaukitsoq oqarpoq: ”Immikkut tikkuarumavara Halibut Greenland-ip aalisartunut ilaqutaannullu iluaqutaasumik nioqqutissiassaminik pisinermini akigissaartitsisarnera, taamalu inuiaqatigiinni akisussaassutsiminik ersersitsisarnera.”

Ukiumoortumik naatsorsuutit takutippaat aalajangersimasumik sulisut 75-it, - ukiumut siulianut sanilliullugu 16-inik amerleriarsimasut, 59-inik sulisoqarsimanermiit, naatsorsuutigineqarlunilu piffissami aggersumi pitsaasunik angusaqartarnissaq. Vittus Qujaukitsoq erseqqissaavoq: ”Halibut Greenland-i kalaallit suliffissaannik aningaasarsiornermillu annertusiartortumik qularnaareqataavoq, inuiaqatigiinnut kalaallinut tamarmiusunut iluaqutaasumik.”

Vittus Qujaukitsoq aamma nalunaarpoq: ”Maluginiarpara Halibut Greenland-ip sulisussat kalaallit pisariaqartitaminnik piginnaanillit ujartormagit, qilanaaraaralu suliassap taassuma ataatsimoorluta iliuuseqarfiginissaa”.

Annerusumik paasissutissanik piniaraanni: Naalakkersuisup allattaa Ilannguaq Møller, mobil 345657, ilmo@nanoq.gl