Hashimik atornerluineq iliuuseqarfigineqartariaqarpoq

Nunatsinni imigassamik atuineq naamaarniartarnerlu annikilliartoraluartut ikiaroornartumik hashimik atornerluineq ajoraluartumik annertusiartortoq innuttaasut peqqissusaannik misissuinermit nalunaarusiami atuarneqarsinnaavoq. Naalakkersuisut ikiaroornartumik hashimik atornerluinermut akiuiniarlutik suliniuteqartut Peqqissutsimut Naalakkersuisoq Doris Jakobsen oqarpoq.

Doris Jakobsen: - Imigassamik atuineq pujortartaneq naamaarniartarnerlu annikilleriarsimagaluartut akerlianik ikiaroornartumik hashimik atuineq annertusiartuinnarpoq, pingaartumik angutit inuusunnerusut akornanni. Inuusuttuaqqat ikiaroornartumik misiliisartut ajoraluartumik aamma amerleriapiloorsimapput. Tamanna ernumanartorujussuummat Naalakkersuisuni aalajangerpugut ikiaroornartumut akiuiniarneq pimoorullugu immikkut iliuuseqarfigineqartariaqartoq.

Naartusut ilaqutariit nunaqarfimmiullu

Naartusut ikiaroornartumik atornerluisut piaartumik katsorsarneqartarnissaat  meerartaareersullu ikiaroornartumik allanillu atornerluisut ilaqutariinnut inissianut inissillugit katsorsarneqartarnissaat Peqqissutsimut Naalakkersuisoqarfimmi sulissutigineqarput.

Nunaqarfinni ikiaroornartumik hashimik atuineq immikkut aamma iliuuseqarfiginiarneqarpoq.

Doris Jakobsen: - Ukiuni kingullerni ikiaroornartup nunaqarfinni atugaanera ajoraluartumik ernumanartumik ersarissorujussuanngorsimavoq allaat oqariartuutiginertalerluni illoqarfinniit nunarfinnut ikiaroornartumik pisiniartoqartalersimasoq. Paasisaq tamanna tupannartorujussuummat Naalakkersuisuni aalajangerpugut nunatsinni ikiaroornartup sumi atugaanera pillugu misissuisoqassasoq, paasissutissat pissarsiarineqartut  suleriarnissatsinnut atorneqartussaassammata.

Doris Jakobsen: - Peqqissutsimut Naalakkersuisutut kissaatigaara haship siammarsimaneranik misissuinissap saniatigut haship arsaarinnissutaasup akuinik misissuisoqartalissasoq, haship Danmarkimeersuunera imaluunniit nunanit allaneersuunera ulorianassusialu paasiniarlugit. Ikiaroornartoq pillugu tusagassiuutit arlallit suleqatigalugit paasisitsiniaanissaq  aamma kissaatigaara.

Suleqatigiissitat pilersinneqartut

Ikiaroornartoq akiorniarlugu Naalakkersuisut immikkut iliuuseqarnissaat Inatsisartut siorna ukiakkut ataatsimiinneranni aalajangiunneqarpoq, Naalakkersuisullu suleqatigiissitaqarput Naalakkersuisoqarfiit akimorlugit suleqatigissitaasumik. Atorfilittat immikkut suleqatigiissitaqarput, politiinit atuarfeqarfinnit, ilinniarfeqarfinnit allanillu attuumassuteqartunit inuttalinnik. Imigassaq ikiaroornartullu pillugit Siunnersuisooqatigiit Kanukokalu aamma suleqataapput. Ikiaroornartumik atornerluinermut akiuiniarluni sulineq periusissiamik nassataqassaaq. Periusissiassap naammassinnginnerani innuttaasunik tusarniaanissaq pilersaarutaavoq.

Doris Jakobsen: - Inatsisartuni partiit tamarmik suleqataanissaat pingaaruteqarmat tamaasa oqaloqatigaakka pingaartitaat ilanngunneqarniassammata. Akiuiniarnissamik periusissap Inatsisartut upernaaq manna ataatsimiinneranni saqqummiunneqarnissaa naatsorsuutigaarput.

Suleqatigiissitap suliassatut kissaatai arlaqarput:
 
- Hashimik atornerluinerup sinerissamut siammarsimanera pillugu qulaajaaneq.

- Meeqqat atuarfiini paasisitsiniaasoqassaaq, paasineqarmat meeqqat ikiaroornartumik misiliisartut ukiukilligaluttuinnartut.

- Atuartunut oqaloqatiginnittarnissamut sakkussat upalungaarsimanissamullu pilersaarutit.

- Inuusuttunut suliffeqanngitsunut katsorsaanikkut siunnersuisarnikkullu neqeroorutit.

- Politiit suliniutaannik nukittorsaanissaq.

- Ilinniartunik ikiaroornertumik atuisoqarneranik pasittaassaqarnermi  misissuisinnaatitaalernissaq.

- Killeqarfinnik nakkutilliisunik marlunnik atorfinitsitsisoqareerpoq nakkutilliisullu qimmii ataatsimik aamma ilaneqarlutik.

- Ikiaroornartunik allanik eqqussisoqartalersimammat misissuinermi atortorissaarutinik timimullu scannereqalernissaa.