Siusinaartumik pensionisiat pikkorissartitsissutigineqarnissaat

Siusinaartumik pensionisiat pillugit maleruagassat nutaat pikkorissartitsissutigineqarnissaanni inuit 100-t peqataassapput

Siusinaartumik pensionisiat pillugit maleruagassat nutaat 1. juli 2016-imi atuutilersussat, ulluni 2.-4. maj pikkorissartitsissutigineqarneranni inuit 100-t pallillugit peqataassapput.

Pikkorissartitsineq kommunini tamarmiusuni politikerinit, pisortanit aammalu isumaginnittoqarfinni suliffissarsiuussisarfinnilu suliassanik suliarinnittartunit peqataaffigineqartus­saq Ilaqutariinnermut, Naligiissitaanermut Isumaginninnermullu Naalakkersuisoqarfimmit ingerlanneqassaaq.

Pikkorissartitsinerup siunertaraa siusinaartumik pensionisiat pillugit maleruagassat nutaat, Inatsisartut 2015-imi ukiakkut ataatsimiinneranni akuersissutigineqartut, Naalakker­suisullu aaqqissuusseqqinnerannut ilaasut, 1. juli 2016-imi atuutilersussaammata kommunit tamatuminnga piareersarneqarnissaat.

Maleruagassat nutaat ilaatigut kingunerissavaat siusinaartumik pensionisiallit sulisinnaassuseqartut amerlanerujussuit suliffeqalernissamut periarfissaqalernissaat. Taamaammat siusinaartumik pensionisiallit amerlasuut sulisinnaassusiat paasiniarluarneqassaaq. Tassani siunertaavoq sulisinnaassusiannik ineriartortitsinissaq, soorlu piginnaanngorsaaqqinnikkut.  

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen pikkorissartitsinermut atatillugu oqarpoq,

”Kommunit siusinaartumik pensionisiallit suliffeqalersinnaanissaat siunertaralugu sulisin­aassusiannik nalilersuisussat annertusaasusallu pikkorissartitsinitsinnut taamak amerlatigisunik peqataatitsinerat nuannerpoq. Suliassap kommuninit pimoorunneqarnera, suleriaqqinnissamilu aallartilluaataanissaa tamatuma ersersippaa.” 

Pikkorissartitsinermissaaq peqataassapput isumaginninnermi siunnersortinngorniat qulit, taamaalillutik siusinaartumik pensionisiat pillugit suliassat qanoq suliarineqartarnerannik paasisaqartussat.

Paasisaqarluarnerorusulluni attavigineqarsinnaavoq: Ministersekretær Hanne Nielsen, oqarasuaat 53 93 71, mail hani@nanoq.gl