Oqaloqatigiittaritsi - Sapaatip akunnera 18-imi

Sapaatip akunnera 18-imi imigassamik aalakoornartumik atuisarnerput imertariaaserpullu isiginiartarparput. Ukioq manna sapaatip akunnera 18-imi qulequtaavoq meeqqat inuusuttullu imigassamik aalakoornartumik atuilinnginnissaannut inersimasut akisussaaffiat. Oqaasinnaaq “Oqaloqatigiittaritsi” atorlugu meeqqavut imigassamik aalakoornartortalimmik oqaloqatiginninnissamik kajumissaarivoq.

Peqqissutsimut Naalakkersuisoq Doris Jakobsen illoqarfinnit 11-init nunaqarfinnillu 26-init qinnuteqaatit sapaatip akunnera 18-imi aaqqissuussinernut tapiissuteqarnikkut akuerisimavai.

-”Nuannaarutigaara ukioq manna aamma sap.ak. 18 malunnartinniarlugu annertuumik tapersersorneqarmat neriuutigaaralu oqallinneq uummaarikkumaartoq. Inersimasut akisussaaffiat meeqqallu peqqinnarnerusumik inooriaaseqarnissaannik periarfissinniarlugit tapersersorniarlugillu ukkanniarlugu aalajangersimavugut  ”, taamak oqarpoq  Peqqissutsimut Naalakkersuisoq Doris Jakobsen nangillunilu:

-” Angajoqqaat inersimasullu meeqqat akornaniittut meeqqat inuusuttullu peqqinnerannut aalajangiisooqataasarput.  Meeqqagut oqaloqatigigaangatsigit, piffissamik atueqatigigaangatsigit, sunngiffimmilu sulerineranni sammisassani tapersersoraangatsigit, inuunermi peqqinnartumi tupatorfiunngitsumi imigassartorfiunngitsumi allanillu aanngajaarniutinik atuiffiunngitsumi tapersersortarpavut.”

Sapaatip akunnera 18-ip aallaavigaa innuttaasut peqqinnerunissaannut pilersaarutip Inuuneritta 2-p siunertaa meeqqat inuusuttullu atornerluisunngunnginnissaat pinaveersaassallugu, maaniinnaq inersimasut aalakoortut ersinnerat killilissallugu aalakoornartumillu atuineq annertunerpaamik killilissallugu.

Sapaatip akunnera 18 pillugu uani takusaqarsinnaavutit: www.peqqik.gl/sapak18

Annertunerusumik paasisaqarnissamut attavissaq naalakkersuisumut allatsi Rosa  Thorsen oqarasuaat: +299 55 33 03 imal. e-mail: rosat@nanoq.gl