Akitsuutit Inatsisartuni isummerfigineqassapput

Aalisakkat akitsuussersorneqartartut amerlineqassanersut Inatsisartut isummerfigisussanngorpaat

Qalerallit akitsuutaat aamma aalisakkat ikerinnarsiortut Tunumi pisarineqartut ilaasa akitsuuserneqartarnerannut inatsisip allannguuteqartinneqarneratigut inuiaqatigiit isertitaqarnerusalernissaat aqqutissiuunneqassasoq Naalakkersuisuniit siunnersuutigineqarpoq.

Naalakkersuisut siunnersuutaat taanna tallimanngornermi apriilip 15-ianni Inatsisartuni oqaluuserineqartussat ilagaat.

Naalakkersuisut tassuuna anguniarpaat aalisakkat iluanaarutaasinnaasumik aalisarneqarsinnaasut maanna akitsuusersugaanngitsut siunnissami akitsuuteqalersinneqassasut, aalisakkanik tamakkuninnga aalisartut allanik aalisartut pineqarnerattulli atuinerminnut akiliisartusanngorlugit.

Inatsimmik allanngortitsinissaq Inatsisartunit akuerineqassappat saarulliit, kullerit, saarulliusaat aamma suluppaakkat sinerissap avataani pisat akitsuusersorneqarsinnaalissapput. Aamma aalisakkat ikerinnarsiortut akitsuutaata maanna atuuttup Tunumi aalisarnermi pisarineqartunuinnaq atuukkunnaarluni, aammali nunat allat aalisarnikkut oqartussaaffigisaanni aalisarnermi aamma nunat tamat imartaanni aalisarnermi pisarineqartunut atuuttussanngortinneqassasoq ilanngullugu siunnersuutigineqarpoq. Naalakkersuisut siunnersuutaanni aalisakkanut pineqartunut akitsuutigitinneqalersussat kilomut 0,55 kroniutinniarneqartut takuneqarsinnaavoq.

Naalakkersuisut siunnersuutaat taanna apriilip 15-ianni siullermeerneqariarluni Inatsisartut upernaaq manna ataatsimiinnneranni aappassaannerlugu pingajussaanneerlugulu oqaluuserineqassasoq pilersaarutaavoq.