Naalakkersuisut aaqqissuusseqqinnertik ingerlateqqippaat

Allattoq: Allattoq: Kim Kielsen, Naalakkersuisut Siulittaasuat

Siumut, Demokraatit Atassutillu naalakkersuisooqatigiinnissamut isumaqatigiissutaat ukioq ataaseq sinnerlugu atuussimalerpoq. Naalakkersuisut Inatsisartunilu partiit naalakkersuisuutitaqartut ataatsimoorlutik sulinerannut tunngaviulluarnera erserpoq. Toraagassaq aalajangiunneqarpoq. Naalakkersuisut Inatsisartuni upernaaq manna ataatsimiinnissamut oqaluuserisassanik 28-nik suliassanngortitsivoq, taakkulu nuna ataatsimoortoq, toqqissisimasoq ineriartortorlu anguniarlugu naalakkersuisooqatigiinnissamut isumaqatigiissummi anguniakkat piviusunngortinnissaannut aqqutissiueqataassapput.

Aningaasarsiornerup siuarsarneratigut, inuussutissarsiutit ineriartortinnerisigut amerlanerusullu ilinniagaqalersinnerisigut innuttaasut pitsaanerusumik siunissaqartilersinnaagipput pitsaanerusumillu inuunermikkut atugassaqartilersinnaagipput Naalakkersuisut upperilluinnarpaat. Taamaammat aaqqissuusseqqinnerit ingerlateqqinneqarput.

Naalakkersuisut siunnersuutigaat soraarnerussutisiaqarnissamut aaqqissuussinernut nunani allaniittunut akiliutit akileraaruserneqartalissasut, taamaalilluni soraarnerussutisiassatut Nunatsinni katersorneqartut nunami maani akileraarutigineqassallutik. Ullumikkut soraarnerussutisiat tigusisussamut tunniunneqaraangata aatsaat akileraarutigineqartarput, naatsorsuutigineqarporlu soraarnerussutisiassanut akiliutigineqartartut 30 procentii nunani allani soraarnerussutisiaqarnissamut aaqqissuussinernut akiliutigineqartartut. Tamanna allanngortinneqassaaq. Naalakkersuisut piumasaraat soraarnerussutisianut akileraarutit nunanit allanit iluaqutigineqarnatik nunatta iluaqutigissagaat.

Nunatta pissarititaasa inuiaqatigiinnit iluaqutigineqarnerulernissaat Naalakkersuisut kissaatigaat.
Saarulliit, kullerit, saarulliusaat suluppaakkallu isumalluutinik atuinermut akitsuuserneqartalernerisigut aalisakkallu ikerinnarsiortut akitsuutaata atuuttup Tunumi aalisarnermi pisarineqartunuinnaq atuukkunnaarsinneratigut nunatta pissarititaanit inuiaqatigiit aningaasarsiornikkut piffissaq ungasinnerusoq eqqarsaatigalugu tamakkiinerusumik pissarsiaqarnerulersinnaassapput.

Akitsuutit nunatta karsianut isaatitsiinnanngillat. Innuttaasut peqqinnanngitsumik inooriaaseqarnerisa pinaveersimatinnissaannut akitsuutit sakkutut aamma atorneqarsinnaapput. Illoqarfigisatsinni meeqqat, inuusuttut inersimasullu eqeersaatitalinnik imeruersaatitortut isigaagut, naak tamanna peqqinnanngilluinnarsinnaagaluartoq.

Innuttaasut peqqissusaat pualavallaarnermik, sukkornermik peqqinnanngitsumillu inooriaaseqarnermik aallaaveqartumik kinguneqartitsinermik unammilligassaqareerpoq. Naalakkersuisut taamaammat kissaatigaat tunisassianik peqqinnanngitsunik atuinerup apparsarnissaanut suleqataajumallutik, ilaatigut eqeersaatitalinnik imeruersaatinut imeruersaatinillu allanik koffeinitalinnik eqqussuinermut akitsuusiinikkut.
Naalakkersuisut ilanngullugu siunnersuutigaat imeq eqqussorneqartoq akitsuuserneqassasoq.

Aningaasaqarnerup sukanganerusumik aqunnissaa
Nunatta karsia amerlanerusunik aningaasalersorneqartariaqarpoq nunattali aningaasaqarnikkut nammineernerulernissaanik Naalakkersuisut anguniagaqarneranni aningaasaqarnerup pitsaanerusumik aqunneqarnissaa pingaaruteqarluinnarpoq.

Taamaammat Naalakkersuisut siunnersuutigaat missingersuutit naatsorsuutillu pillugit inatsimmi sukaterisoqassasoq.
Utoqqaat amerliartortillugit sulisinnaasullu ikiliartortillugit pilersuisussaatitaaneq siunissami annertusiartuinnartussaavoq. Aningaasaqarneq sukanganerusumik aqunneqartariaqarpoq, pisortammi aningaasartuutaat amerliartortussaapput, sipaarniartoqartariaqarnera annertusiartortussaalluni nunattalu karsianut isaatitsinissamut pisariaqartitsisoqaraluttuinnartussaalluni.

Pisortat aningaasaqarnerat ataqatigiilluinnarput, taamalu Namminersorlutik Oqartussat kommunillu pitsaanerusumik ataqatigiissaarisinnaasariaqarlutik, nalinginnaasumillu pisortat ingerlatsineranni sukanganerusumik aningaasaqarnikkut aqutsisoqartariaqarluni.

Missingersuutit naatsorsuutillu pillugit inatsimmi Namminersorlutik Oqartussat kommunillu aningaasaqarnikkut namminersorsinnaatitaanerat taamaammat sukateriffiginiarlugu Naalakkersuisut siunniussaqarput.

Inuussutissarsiutinik ineriartortitsinissamut Naalakkersuisut anguniagaanni inuussutissarsiutini sukarsuit sisamat – aalisarneq, aatsitassarsiorneq, takornariaqarneq nunamilu inuussutissarsiutit allat – suli aallunneqarput. Inuussutissarsiutinik ineriartortitsinermut tunniussinnaasatta pingaarnerit ilagaat pitsaasumik unammillersinnaasumillu atugassaqartitsinissaq ullutsinnullu naleqquttumik inatsiseqartitsinissaq. Taamaammat piginneqatigiiffiit pillugit inatsit aamma inuussutissarsiutinik ingerlatsisutut aningaasaateqarfiit pillugit inatsit nutarterniarpagut.

Aamma siunnersuutigaarput nunami inuussutissarsiutinut tunngatillugu inuussutissarsiornermik siuarsaaneq nutarteriffiginiarlugu. Siunnersuut aallartisaasunut pitsaanerusumik atugassaqartitsilissaaq, branchet aalajangersimasut suliffeqarfiilluunniit immikkuullarissut aallartisarnerup nalaani siunnersorneqarsinnaalissallutik tapersersorneqarsinnaalissallutillu.

Aatsitassarsiornermut tunngatillugu qinngornernik ulorianartulinnik qanoq isumannaatsumik passutarinnissinnaanermut nunani tamalaani piumasaqaatit sakkortunerpaat naapertorlugit atomitallit pillugit isumannaallisaanermi nakkutilliinermilu ullutsinnut naleqquttumik inatsiseqalernissaq qulakkeerniarlugu Naalakkersuisut sulinertik ingerlatiinnarpaat.

Naalakkersuisut upernaakkut ataatsimiinnermi matumani ilaatigut siunnersuutigaat, atomitallit Nunatsinneersut eqqissiviilliornernut atorneqartussaanngilluinnarnissaat inatsisitigut qulakkeerneqassasoq nunanilu tamalaani atomitalinnut tunngatillugu ikiuinissamut Kalaallit Nunaat peqataatinneqarsinnaalissasoq.


Ilinniartitaaneq meeqqallu
Amerlanerusut ilinniagaqalerpata tamanna nunatsinnik siuarsaaqataassaaq. Naalakkersuisut taamaammat kissaatigaat inuusuttut ilinniakkaminnik naammassisaqarnissaannut pitsaanerusumik piareersarneqarsinnaalissasut.

Taamaammat inuussutissarsiutinik ilinniartitaanermi periarfissat pitsanngorsarpagut, inuussutissarsiutini ilinniarfiit Akuerisaasumik inuussutissarsiornermik sammiveqartumik, misilitsinnermik naammassineqartartussamik, neqerooruteqarsinnaalersinniarlugit. Ilinniartut fagini ataasiakkaani piginnaanngorsarneqassapput taamalu ilinniakkaminnik naammassinninnissaminnut ilinniaqqinnissaminnullu pitsaanerusumik sakkussaqalissallutik.

Meeqqat atugaat uummatermioreqaakka. Taamaammat 2016-ip meeqqanut ukioritinneqarnissaata taamak amerlatigisunit tapersersorneqarnera nuannaarutigaara.

Meeqqat ukioqartinneqarnerannut 2016-imi immikkut ittumik iliuuseqarnissarput siunertaanngilaq. Naamik, meeqqat ukioqartinneqarnerannut meeqqat atugaasa peroriartornerisalu ataavartumik aallunneqalernissaat siunertaavoq.

Meeqqat atugaat pillugit tamatta aallussillaqqinnerulertariaqarpugut, qinigaagutta, suliassaqartuugutta, angajoqqaajugutta arlaatigulluunniit meeqqamut attaveqaataagutta. Ukioq mannaannaanngitsoq, siunissamili aamma. Inersimasuusugut tamatta akisussaaffigaarput meerartatta pitsaasumik toqqissisimasumillu peroriartortinnissaat. Tamassuma suliniutiginerani Naalakkersuisut siuttoorusussinnaapput.

Upernaakkut ataatsimiinnermi ilinniarfeqarfinni aanngajaarnartunik atornerluinerup nungusarnissaa, meeqqat video atorlugu killisiorneqarneranni illersorneqarnissaat kiisalu pinerluuteqartup takussutissanik qimatsiviginniffigisinnaasaani assersuutigalugu toqutsinerni, pinngitsaaliinerni meeqqanillu atornerluinerni pitsaanerusumik paasiniaallunilu pinerlunnernik paasisaqarsinnaalernissaq sulissutigissavarput.

Inatsisartuni upernaaq manna ataatsimiinnermi pissanganartumik politikkikkut oqallillutalu pingaarutilinnik aalajangiussaqarnissagut qilanaarivakka.

Pisarnittut neriuutigaara angorusullugulu oqallinnigut innuttaasunut nunattalu siunissaanut pitssaasunik angusaqarfiujumaartut.