Naalagaaffeqatigiit Kalaallit Nunaanni ataatsimiittut

Statsministeri Lars Løkke Rasmussen, Lagmandi Aksel V. Johannesen Naalakkersuisullu Siulittaasuat Kim Kielsen Naalagaaffeqatigiit ukiumoortumik ulloq 29. apriili 2016 ataatsimiinneranni naapipput. Naalagaaffeqatigiit ataatsimiinnerat Kalaallit Nunaanni ukioq manna ataatsimiipput Naalakkersuisut Siulittaasuat qaaqqusisoralugu.

Naalagaaffeqatigiit ataatsimiinneranni Naalakkersuisut Siulittaasuata, Statsministerip Lagmandillu ataatsimoorlutik soqutigisaqarfimminni politikkikkut eqqartuipput, ataatsimiinnerullu kingorna tusagassiortunik katersortitsinermi saqqummiussillutik.

Naalagaaffeqatigiit ukioq manna ataatsimiinnerat rubinisiorfimmi Aappaluttumi Qeqertarsuatsiaat kujataaniittumi Nuummiillu kujammut 150 kilometerit missaannik ungasitsisigumiittumi.

Aappaluttumi rubinisiorfik ingerlatseqatigiiffimmit True North Gems-imit pigineqarpoq. Piiaaffissaq tunisassiorfissartaalu sanaartorneqaleruttorput piiaanerlu ukiup ingerlanerani aallartinnissaa naatsorsuutigineqarpoq. True North Gems-ip naatsorsuutigaa rubinisiorfik aallartippat 80-inik suliffissaqartitsiumaartoq.

Aappaluttumi rubinisiorfimmeeriarlutik angalaqatigiit Qeqertarsuatsiaaniipput Kommuneqarfik Sermersuup aaqqissuussaanik nunaqarfimmi kaffillertoqarluni. Kaffillernerup innuttaasunillu naapitaqarnerup saniatigut borgmester Asii Chemnitz Narup nunaqarfimmilu aqutsisunut siulittaasoq Jonathan Petersen aatsitassarsiorfimmut qaninnerpaatut Qeqertarsuatsiaani iluaqutaanerpaajunissaanik True North Gems-imik suleqateqarneq pillugu ilisimatitsipput.

Naalakkersuisut Siulittaasuat Kim Kielsen oqarpoq:

”Naalagaaffeqatigiit ataatsimiinnissaanut atatillugu Aappaluttumi True North Gems-ip Qeqertarsuatsiaanilu Kommuneqarfik Sermersuup ikiuukkusussuseqarluarlutillu tikilluaqqusilluarnerat nuannaarutigeqaara.

Pisup Kalaallit Nunaanni aningaasarsiornikkut iluaqutaasumik suliffissaqartitsisumillu aatsitassarsiornikkut siuariartortoqarlunilu ineriartortoqarneranik suleqatinnut takutitsisinnaalersippaanga.

Suleqatima statsiministerip lagmandillu Qeqertarsuatsiaani innuttaasunik ilassinninnissamut aatsitassarsiorfimmillu innuttaasut qanoq tikilluaqqusisimanerat pillugu paasisaqarnissamut periarfissaqarsimammata aamma nuannaarutigaara.”

 

Paasisaqarnerorusuttut attavissaat: Naalakkersuisumut allatsi Kirsten Enequist, oqa. +299 58 37 54.
True North Gems Aappaluttumilu rubinisiorfik pillugu paasissutissat: www.truenorthgems.com
Kommuneqarfik Sermersooq pillugu paasissutissat: www.sermersooq.gl