Savalimmiut Nunattalu suleqatigiinnerat nukittorsarneqartoq

Savalimmiut Kalaallit Nunaatalu suleqatigiinnerisa nukittorsarneratigut Savalimmiuni Kalaallit Nunaannilu inuussutissarsiuteqartut, kattuffiit, peqatigiiffiit inuillu ataasiakkaat suliniutinik aalajangersimasunik suleqatigiikkusussuseqartilissavaat.

Tamanna suleqatigiinnissamut isumaqatigiissummi Savalimmiuni lagmandimit Aksel V. Johannesenimit Naalakkersuisullu Siulittaasuannit Kim Kielsenimit, lagmandip Naalagaaffeqatigiit ataatsimiinnissaat sioqqullugu tikeraarnerani, atsiorneqartumi ilaatigut imarineqarpoq.

Naalakkersuisut Siulittaasuata lagmandillu politikkikkut oqaluuserisassat assigiinngitsut Naalakkersuisunut Savalimmiunilu naalakkersuisunut soqutiginaateqartut oqaluuserineqarput. Lagmandip Naalakkersuisullu Siulittaasuata oqaloqatigiinnermi isumaqatigiissutigaat suleqatigiinnerup nukittorsarneqarnissaa Savalimmiunut Kalaallit Nunaannullu nalilerujussuusoq.

Naalakkersuisut Siulittaasuat Kim Kielsen oqarpoq:

- Lagmandip tikeraarnerani politikkikkut suleqatigiinnissamik isumaqatigiissutip nutarterneqarnera nuannaarutigeqaara, isumaqatigiissutimmi nunatta marluk akornanni attaveqaqatigiinneq siuarsarneqassaaq – naalakkersuisuniinnaanani, aammali nunani taakkunani marlunni innuttaasut soqutisaqaqatigiillu akornanni. Aamma nuannaarutigaara avatangiisit nukissiornerlu pillugit suleqatigiinnerup siunissami qaninnerusumi ukkatarineqarnissaa isumaqatigiissutigigatsigu. Suliassaqarfinni taakkunani nunani pineqartuni ineriartorneq annertusimaqaaq, suleqatigiinnerulernitsigullu qanoq iliornikkut suli siuariartortoqarsinnaanera misissussallutigu.

Savalimmiuni lagmandi Aksel V. Johannesen oqarpoq:

- Kalaallit Nunaata Savalimmiullu suleqatigiinnerat massakkut ineriartorluarpoq. Nunat akornini suli annertunerusumik atassuteqarnissamut piumassuseqarnitsinnik maanna politikkikkut suleqatigiinnissamut isumaqatigiissummik nutarterinerput takussutissaavoq. Kalaallit Nunaat Savalimmiullu amerlasuunik soqutigisaqaqatigiillutillu unammilligassaqarput tamakkulu nunanit taakkunannga iluaqutaasumik suleqatigiissutigisinnaavagut. Akerleriinnilli ilaanni aamma soqutigisaqartarpugut. Tamakku ammasumik unneqqarissumillu oqaloqatigiissutigerusuppagut taamaalilluta ataqqeqatigiilluta atassuteqarluarnerput nukittorsarlugulu annertusarsinnaagatsigu.

Aksel V. Johannesen Kalaallit Nunaannut tikeraarpoq Danmarkimi, Savalimmiuni Kalaallit Nunaannilu nunamik aqutsisut naalagaaffeqatigiittut ukiumoortumik ataatsimiinnissaannut atatillugu, ataatsimiinnissarlu taanna Kalaallit Nunaanni pissaaq tallimanngornermi ulloq 29. apriili 2016.

Savalammiunit angalaqatigiit tassaasut lagmand nulialu saniatigullu atorfilittat pingasut, Utoqqarmiut Kangerluarsunnguannut erngup nukinganik innaallagissiorfik takusarpaat Savalimmiormiullu Nuup kujataani aalisakkeriffigisimasaat Nordafar Færingehavnilu aamma alakkarterlugit.

Ineriartornissamut suleqatigiinnissamillu isumaqatigiissut nutaaq uani atuarsinnaavat.

Paasisaqarnerorusuttut attavigisinnaavaat: Søren Hald Møller, Naalakkersuisut Siulittaasuata Naalakkersuisoqarfiani pisortaq, oqa. +299 34 50 00 imaluunniit e-mail govsec@nanoq.gl, imaluunniit Marjun Hanusardóttir, Løgmandsskrivstovanimi naalakkersuisoqarfimmi pisortaq, oqa. +298 55 10 30.