Meeqqat sakkortuumik pinerluffigineqartut pitsaanerusumik pineqartalissapput

”Nuannaarutigaara, Inatsisartut isumaqatigiissut meeqqanik inuusuttunillu video atorlugu apersuisarnermut maleruagassanik allannguinissaq tapersermassuk. Siunnersuutip taperserneqarnerani meeqqat inuusuttullu amerlanerusut sakkortuumik pinerluffigineqarsimatillutik video atorlugu apersorneqarsinnaalerput”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Inatsisartut ullumi ataasinngornermi 25. april 2016-imi maleruagassat atuuttut video atorlugu apersuisarnermik ilaneqarnissaannut aalajangiiffigisassatut siunnersuut suliaraat. Maleruagassat nutaat atuutilernerisigut, video atorlugu apersuisarnermi ukiunut killissarititaasut 12-iniit 15-inut qaffanneqarput. Pisut ilaanni inuusuttut 18-it tikillugit ukiullit video atorlugu apersorneqarsinnaassapput. Maleruagassat Folketingimit akuersissutigineqarunik erngerlutik atuutilernissaat naatsorsuutigineqarpoq.

”Meeqqat inuusuttullu paarilluarneqarnissaannut immikkut akisussaaffeqartugut Naalakkersuisut isumaqarput. Minnerunngitsumik pinerlunnermik sakkortuumik, soorlu persuttarneqarnermik kinguaassiutitigullu atornerlunneqarnermik unioqqutitsivigineqartillugit. Video atorlugu apersuisarnermik aaqqissuussinerup annertusineqarnerani meeqqat inuusuttullu taamatut atugaqartut immikkut eqqarsaatigineqarsinnaanissaat ajornarunnaarpoq. Meeqqat inuusuttullu taamatut illersorneqartariaqartut Naalakkersuisut isumaqarput. Taamaattumik Inatsisartut siunnersuummut tapersiinerat Naalakkersuisunit naammagisimaarneqarpoq”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

Annertunerusumik paasisaqarusunnermi Naalakkersuisup allattaa Elise Uupi Kuitse, telefon 34 54 14-mut, imaluunniit immikkoortortaqarfimmi pisortaagallartoq Camilla Østbirk, telefon 34 60 19-imut attaveqarfigineqassapput.