Tasiilap eqqaani qilalukkat qernertat misissuiffigineqartussanngorput

Qilalukkanik qernertanik biologit Tasiilap eqqaani misissuinerat piujuartitsinerup annertunerusulernissaanut iluaqutaassaaq

Ulloq 13. april 2016 Aningaasaqarnermut Akileraartarnermullu Ataatsimiititaliaq aalajangerpoq akueralugu Pinngortitaleriffik, 482.500 koruuninik ilassutitut aningaasaliiffigineqassasoq. Aningaasat 2016-imi Tasiilap eqqaani qilalukkanik qernertanik nalunaaqutsersuinissaq pillugu misileraalluni suliniummut atorneqassapput.

Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq:

Tasiilap eqqaani qilalukkat qernertat sukkoorlutik ingerlaartarnersut, aammalu aasaanerata avataani sumi uninngaartarnersut annikitsuaraannarmik ilisimaneqarpoq. Taamaattumik ilisimasanik annertunerusunik katersinissaq pingaaruteqarpoq, taamaalilluta qilalukkat qernertat siunissami piujuartitsiviusussamik piniarneqartarnissaat siuarsaavigisinnaallutigu. Suliniut taanna tamatumunnga iluaqutaasinnaavoq.

Suliniut siunissami qilalukkat qernertat amerlassusaannik biologit pitsaanerusumik siunnerfeqarnerusumillu misissuisarnermik malitseqarsinnaavoq. Maannakkut biologit siunnersuisarneranni 2008-imi kisitsinernit uumasut amerlassusaannik missiliuineq aallaavigineqartarpoq, taannalu ullumikkut annertuumik nalorninartortaqarpoq.

Isorliunerusuni siunissami piniagassat piujuartitsisussamik piniarneqartarnissaasa qulakkeernissaanut, biologit misissuineri patajaatsut aalajangiisuulluinnartumik pingaaruteqarput. Biologit patajaannerusumik siunnersuisarnissaat sapinngisamik piaartumik anguniarniarlugu, Tunumi qilalukkanik qernertanik kisitsinissaq 2016-imi aasaaneranut pilersaarutigineqarpoq.

Annertunerusunik paasisaqarusunnermi attaveqarfigineqassaaq Pinngortitamut, Avatangiisinut Inatsisinillu Atuutsitsinermut Naalakkersuisoqarfik oqarasuaammut +299 34 50 00 imaluunniit email paian@nanoq.gl