Appat manniinik mannissarniarneq inerteqqutaavoq

Appat lomvier

Nunatta Kujataani Kitsissut Avallerni appat killiffiat pillugit Pinngortitaleriffimmit tusagassiorfinnut nalunaarut innersuussutigalugu, appat ikileriarnerannut peqqutaa­qataasut ilagaat taqqavani unioqqutitsilluni mannissarniarneq.

Naalakkersuisoqarfiup timmissat illersorneqarnerat piniagaanerallu pillugu nalunaa­rummi atuuttumi § 7 innersuussutigissavaa. Nunatsinni innuttaasunit tamanit eqqumaffigeqquneqarpoq appat manniinik mannissarniarneq inerteqqutaammat Naalakkersuisoqarfiup ilisimatitsissutigissavaa, unioqqutitsinerlu akiliisitsissummik pillaatissiissutaasinnaammat.

Naalakkersuisunit erseqqissaatigineqarpoq, innuttaasut tamarmik akisussaaffeqa­qa­taam­mata Nunatsinni appanik piujuartitsilluni iluaqutiginninnerup qulakkeerne­qarnissaanut, taamaasilluni kinguaariit tulliit aamma siunissami timmissamik kusanartumik mamarluartumillu taassuminnga nuannaaruteqartarsinnaanissamut.

”Appap mannia kuultitut naleqarpoq” appat pillugit plakatimi oqariartaasiuvoq nutaaq, Aalisarnermut, Piniarnermut Nunalerinermullu Naalakkersuisoqarfiup (APNN), timmissanik "Timmissat Sammillugit" pillugit paasititsiniaanerup ilaatut saqqum­mersitaani, taanna aasaq aallarnerneqarpoq tassani Ilulissani aamma Upernavimmi innuttaasunik ataatsimiisitsisarnerni.

Appat pillugit plakati suli soqutiginassuseqarpoq. Pinngortitaleriffiup appaqarfik Kitsissut Avalliit Kujataaniittoq 2015-imi tikillugu alakkarterpaa. Tikinneqartoq innaq timmiaqarfik timmiaqanngitsoq siumorneqarpoq. Innaq timmiaqarfik ukiuni  1992, 1999 aamma 2010-mi tikinneqarpoq ukiunilu taakkunani timmissat amerlassusaat 1900-t, 1066-it aamma 619-nik amerlassuseqarsimapput. Pinngortitaleriffik APNN-imut ilisimatitsilluni allappoq appat ikiliartornerannut peqqutaasut arlaliusinnaasut, kisianni Kitsissut Avallernut tunngatillugu qularutigineqanngilaq mannissarniarneq peqqutaasut ilagigaat.

Naalakkersuisoqarfiup plakatit nassiussuuteqqippai ilaatigut innuttaasunut eqqaa­sitsiissutigalugu appaativut qanoq mianernartiginerinut, kiisalu isumassarsior­fiusus­saalluni nunatsinni atuarfinni meeqqerivinnilu meeqqat atuarfiini ilinniartitsisunut perorsaasunullu appat pillugit sammisaqartarnerni.

Naalakkersuisoqarfiup timmissat pillugit nalunaarut nutarterlugu suliaralugu ingerlappaa, maannakkullu tamanut ammasumik tusarniaareernerup kingorna iluarsartuussassat kingulliit suliaralugit ingerlanneqarput, naatsorsuutigineqarporlu aasamut sulinngiffeqarnissaq sioqqullugu siunnersuut Naalakkersuisunut saqqummiunneqassasoq. Naalakkersuisoqarfiup sukumiinerusumik imarisai pillugit ilisimatitsissaaq Naalakkersuisunit  nalunaarutissaq inaarutaasoq akuerineqareerpat.

Sukumiinerusumik paasissutissat uunga saaffiginninnikkut pissarsiarineqarsinnaapput:

Allaffimmi pisortaq Amalie Jessen + 299 34 53 04, amalie@nanoq.gl