Nakorsat tuluttut oqaasillit sulisinnaalernissaat sulissutigigaat

Peqqissutsimut NUnanillu Avannarlernik Suleqateqarnermut Naalakkersuisup Doris Jakobsenip nuannaarutigaa nunatsinni nakorsassaaleqineq tusagassiuutitigut oqallisaammat, qinikkat ilaatigut partiit akimorlugit nakorsassaaleqinermut aaqqiissutissarsiortoqarluni.

- Nakorsat nunatsinni sulerusulersinniarlugit atorfeqaannartinniarlugillu nakorsat nunatsinni atugaat pitsanngorsarniarlugit Peqqinnissaqarfik suliniuteqareerpoq, nunanili allani nakorsat tuluttut oqaasillit atorneqarsinnaanerat aamma isiginiarneqartariaqalerpoq, Doris Jakobsen, Naalakkersuisumit tapersersorneqarluni oqarpoq.

- Nakorsat tuluttut oqaasillit nunatsinni sulisinnaanissaat misissuiffigaarput. Napparsimasunilli isumannaatsumik sullissineq salliutittuaannartussaavarput, taamaammat qulakkeertariaqarparput napparsimasup nakorsallu akornanni aammalumi nakorsat sulisullu allat akornanni attaveqaqatigiinnerup pitsaanerpaajutinnissaa, Doris Jakobsen oqarpoq.

Tamassuma ilaatigut kalaallisut-tuluttut oqalutsinngorniarnerup atorluarneqarnerulerneratigut. Taamaammat Naalakkersuisut Ilisimatusarfimmi Oqalutsitut Nutserisutullu ilinniarfik suleqatigilluinnarlugu aqqutissarsiorniartut, Doris Jakobsen oqarpoq.

- Ukiup ataatsip qaangiuttup ingerlanerani nakorsat nunani allaneersut nunatsinnut suliartorsinnaanerat sulissutigaarput. Massakkutut itsillugu nakorsat nunani allaneersut nunatsinni sulinissamut najugaqarnissamullu akuersissutaat Danmarkimi Udlændingestyrelsemit tunniunneqartarput. Akuersissutit suliarineqartarnerat pillugu Danmarkimi naalagaaffik oqaloqatigaarput. Nakorsat nunani allaneersut ajornannginnerusumik nunatsinnukarsinnaasariaqarput suliartorlutik, Doris Jakobsen naggasiivoq.



FPaasisaqarnerorusuttut attavigisinnaavaat Naalakkersuisup allattaas Rosa Thorsen mobil: +299 55 33 03 imaluunniit e-mail: rosat@nanoq.gl.