Inatsisitigut isumannaassuseq pillugu ’atortunik misissuipput’

Stemningsbillede af Indlandsisen

Eqqartuussissuserisut Siunnersuisoqatigiit Kalaallit Nunaanni inatsisitigut isumannaassuseq pillugu ’atortunik misissuipput’

Eqqartuussissuserisut Siunnersuisoqatigiit 13. april 2016-imi Pinngortitamut, Avatangiisinut Inatsisinillu Atuutsitsinermut Naalakkersuisoqarfimmut pulaarput.

Eqqartuussissuserisut Siunnersuisoqatigiit suleqatigiissitamik, Kalaallit Nunaanni inatsiseqarnermi inatsisitigut isumannaassutsip ilaanut ’atortunik misissuisussamik’ pilersitsisimanerat tamatumunnga peqqutaavoq. Ataatsimiinnermi inatsiseqarnerup iluani inatsisitigut isumannaassutsimut unammillernartut suussanersut eqqartorneqarput.

Pinngortitamut, Avatangiisinut Inatsisinillu Atuutsitsinermut Naalakkersuisoq oqarpoq:

”Eqqartuussissuserisut Siunnersuisoqatigiit Kalaallit Nunaanni inatsisitigut isumannaassutsimut soqutiginninnerat nuannaarutigisorujussuuara. Suliassaqarfik taanna Naalakkersuisunit annertuumik pingaartinneqarpoq, ukiullu kingulliit ingerlanerini annertuumik siuariarfiusimavoq. Assersuutigalugu pinerluttulerinermik suliani meeqqat inuusuttullu video atorlugu apersuinermik atuisinnaalernissaq Naalakkersuisut sulissutigisimavaat.

Taamatut oqareerlunga aamma oqaatigissavara, pitsannguinissamut inissaqartitsisoqarmat. Tamatumani ilaatigut illersuisut atugaat pitsanngortinniarlugit sulisariaqartugut isumaqarpunga. Taamaattumik Eqqartuussissuserisut Siunnersuisoqatigiit suliaanut malinnaanissarput suleqatigiissitallu inassuteqaatissai Naalakkersuisunit qilanaaraavut.”

Annertunerusumik paasisaqarusunnermi naalakkersuisup allattaa Elise Uupi Kuitse oqarasuaat 34 54 14-imut / email eukl@nanoq.gl imaluunniit immikkoortortaqarfimmi pisortaq Camilla Østbirk på caos@nanoq.gl aqqutigalugu attaveqarfigineqassapput.