Sunngiffimmi piniarnermut allagartap 1. maaji sioqqullugu 2016-imi akilereersimanissaa

Piniarnermut Naalakkersuisoq Karl-Kristian Kruse aalajangiivoq aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaanissamut sunngiffimmi piniarnermut allagartap tuttut umimmaallu pillugit nalunaarutit atuuttut malillugit 1. maaji sioqqullugu akilereerneqarnissaa nalunaarutigissallugu. Tassani tunngavigineqarpoq piniarfinni amerlanerpaani ukiuni arlaqartuni tuttunik umimmannillu kisitsisoqarnikuunnginnera tamannalu pillugu biologinit siunnersuuteqartoqannginnera.

Tamanna pillugu 1. maajimi kingusinnerusukkulluunniit sunngiffimmi piniarnermut allagartamut akiliisimasut 2016-imi aasakkut ukiakkullu tuttunniarnissamut umimmanniarnissamullu akuersissutinik tunineqarsinnaassanngillat.

Ilutigalugu APNN-ip paasisimavaa tuttunniarnissamut umimmanniarnissamullu akuersissutit tunniunneqartartut pingajorarterutaat inorlugu utertinneqartartut. Akuersissutit pisanillu nalunaaruteqarneq piniarnerup naammassineqarnerata kingornatigut kingusinnerpaamik sapaatip akunnerisa marluk qaanngiunnerani utertinneqartussaapput tamannalu pisaqarsimanngikkaluarluniluunniit aamma atuuppoq. Akuersissutit iluamik utertinneqartannginnerat pissutigalugu tuttoqatigiit umimmaqatigiillu qanoq innerat nalileruminaappoq.


Erseqqinnerusumik paasisaqarusukkussi uunga saaffiginnissinnaavusi immikkoortortami pisortaq Amalie Jessen, amalie@nanoq.gl oqa. +299 34 53 04