Akuersissutit pillugit nalunaarut allannguuteqarpoq

Trawler Naalakkersuisut akuersissutit pillugit nalunaarut nutaaq aalajangerpaat, nalunaarut ullumi apriilip 11-anni 2016-imi atuutilerluni.

Nalunaarummi allannguutit pingaarnerit tassaapput:

1) Nalunaarut naapertorlugu akuersissummik tunniussinermi piumasaqaataalerpoq, qinnuteqartoq aalisarnermik inuussutissarsiummik pingaarnertut ingerlataqartutut ingerlatissamaartutullu inuussutissarsiuteqassasoq.

2) Aalisariutit 75 BRT/120 BT-mik oqinnerusut sinerissap qanittuani saarullinniartut aamma aalisarnikkut oqartussaaffiup tunngaviusumik killingata 3 sømilit avataanni saarullinniarsinnaalerput.

3) Akuersissutit piffissami aalajangersimasumi atorneqartussat tunngaviatigut ukiumut ataasiarlugit tunniunneqartassapput, ukiunulli arlalinni atorneqarsinnaassapput, aalisakkat aalisarsinnaanissaat pillugit siunnersuineq ukiunut arlalinnut atuuttuussappat.

4) Piffissami killilerneqarsimasumi pisassat amerlanerpaaffilernagit kalaallit aalisariutaannut umiatsiaraannullu akuersissummik tunniussisoqassaaq nalilersuilluareernermi.

5) Umiatsiaaqqamik aalisarsinnaanermut akuersissutilik aqutsiveqarfinni Qeqertarsuup Tunuani, Uummannami Upernavimmilu qaleralinniarsinnaasoq, sumiiffimmi 47-mi pineqartartumi, Kalaallit Nunaata sinnerani, sumiiffimmi 46-mi pineqartumi, umiatsiaaqqamik qaleralinniarsinnaanermut akuersissummik tunineqarsinnaanngilaq.

6) Umiatsiaaqqamik sumiiffimmi 46-mi aalisarsinnaanermut akuersissutilik, sumiiffimmi 47-mi umiatsiaaqqamik qaleralinniarsinnaanermut akuersissummik tunineqarsinnaanngilaq.

7) Sumiiffimmi 46-mi umiatsiaaqqamik aalisarsinnaanermut akuersissut, umiatsiaaqqamut sumiiffimmi saarullinniarsinnaanermut akuersissutaalersitsivoq.

8) Akuersissut aappaaguani atorneqartussap qinnutigineqarnera Aalisarnermut, Piniarnermut Nunalerinermullu Naalakkersuisoqarfimmi kingusinnerpaamik novembarip 30-anni tiguneqareersimassaaq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl