Akitsuutinut taarsiissutissat pillugit

Mamakujuttut, sunoorsit, sukuluut qummoroortartullu eqqunnerinut akitsuutinik nutaanik qaffanneqartunillu Namminersorlutik Oqartussanit taarsiissutissat pillugit

23. november 2015-imi Inatsisartuni pereersunut atuutsitaasumik mamajukujuttut, sunoorsit, sukuluut qummoroortartullu akitsuutinik nutaat allanngortitallu akuersissutigineqarneri niuertunut kingunerisassanik Naalakkersuisut nalilersuinerinut paasissutissanik kukkusunik tunngavissaqarsimanera Aningaasaqarnermut Aatsitassanullu Naalakkersuisup assut ajuusaarutigalugu nalunaarutigaa.

Piffissami 20. aggustimit 23. november 2015-imut eqqussinermut akitsuutinik nutaanik qaffanneqartunillu suliffeqarfiit angisuuginnaat akiliisussaanerat manna tikillugu ilisimatitsissutaasimavoq. Tamannali eqqortuunngilaq.

Piffissami pineqartumi aamma kioskit mikinerusut, suliffeqarfiit allallu arlallit, kiisalu namminersortutut inuit aamma akitsuutinik nutaanik qaffanneqartunillu akiliisussaasanerat Akileraartarnermut Aqutsisoqarfiup maanna ilisimatitsissutigaa.

Suliffinnut angisuunut aamma mikisunut akitsuutinik akiliisitsiniarnermut aaqqissuussiviit assigiinngitsut pissutigalugit Akileraartarnermut Aqutsisoqarfiup kikkut pereersunut atuutsitaasumik akitsuutinik nutaanik qaffanneqartunillu eqqorneqarnissaanni suliffeqarfiit mikisut manna tikillugu qarsupiinnarsimavaat.

Taamaattumik akitsuutit pereersunut atuutsitamik eqqunneqarlutillu allanngortinnissaat pillugit oqallinnermut manna tikillugu tunngavigisatut nalunaarsuutit soorunami eqqortunik takutitsisuusimanngillat, niuertut inuillu namminersortut eqqorneqartut tamarmik Akileraartarnermut Aqutsisoqarfiup naatsorsuutaani takuneqarsinnaanngimmata.

”Pisoqarsimanera naammaginartuunngivippoq. Paasissutissanik eqqunngitsunik tunngaveqartumik Naalakkersuisut, suliffeqarfiit kikkullu tamarmik nalinginnarmik oqallissimanerat kingunerisimavaa,” Aningaasaqarnermut Aatsitassanullu Naalakkersuisoq Randi Vestergaard Evaldsen oqarpoq, nangipporlu:

”Tamanna tunngavigalugu kukkunerup qanoq pinngorsinnaasimaneranut, aammalu assingusumik kukkusoqarnissaq pinaveerniarlugu siunissamut tunngatillugu qanoq iliortoqarsinnaaneranik aqutsisoqarfiga piaartumik nassuiaasioqqullugu peqqusimavara.

Suliamik tassannga isumaginninneq, aamma niuertunut akitsuutit nutaat qaffanneqartullu pingaaruteqassanerat ima naammaginanngitsigisimatigaaq Naalakkersuisunut niuertunut inunnullu namminersortunut eqqorneqartunik naammaginartumik isumaginninniarnissamut ataasiinnarmik iliuuseqartoqartariaqarluni: Akitsuutinik taakkuninnga pereersunut atuutsitaasumik arlaannaalluunniit akiliisoqassanngilaq.”

Taamaattumik 2016-imi Inatsisartut upernaakkut ataatsimiinneranni oqallisigineqartussamik eqqussuinermut akitsuutit pillugit inatsisip allanngortinnissaa pillugu siunnersuummut nassiunneqareesimasumut naqqiummik nassitsisoqassasoq Naalakkersuisut akuerisimavaat. Piffissami aggustip 20.-annit 23. november 2015-imut mamakujuttunik, sunoorsinik, sukuluunik qummoroortartunillu eqqussinermut akitsuutinik nutaanik imaluunniit qaffanneqartunik suliffeqarfiit, inuit namminersortut allalluunniit akiliinissamik peqquneqassannginnerat naaqiummit allassimassaaq. Aningaasat akitsuutit qaffanneqartut nutaallu nassatarisaannik akilerneqarsimasut utertillugit akiliutigineqarumaarput.

"Taamatut kukkusoqartillugu suliffeqarfinnut tamanut, akitsuutinik akiliisimasut imaluunniit kingornatigut akiliisussanut arlaannaalluunniit akiliissannginnerat naleqqutiinnarpoq,” Aningaasaqarnermut Aatsitassanullu Naalakkersuisoq oqarpoq, neriuutigaalu siunnersuummik Inatsisartut tapersersuissasut.

 

Inussiarnersumik inuulluaqqusillunga,

Randi Vestergaard Evaldsen
Aningaasaqarnermut Aatsitassanullu Naalakkersuisoq