Isumaginninnermut naalakkersuisut Qaasuitsumi

Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen, Isumaginninnermut ministereqarfiup aamma Ilaqutariinnermut, Naligiissitaanermut Isumaginninnermullu Naalakkersuisoqarfiup suleqatigiilluarnerannut nangissutigalugu, ulluni 29. marts – 1. april danskit naalakkersuisuineersumit suleqatiminit, Nunamut namminermut isumaginninnermullu ministerimit Karen Ellemann-imit tikeraarneqarpoq.

Tusagassiutitigut eqqartorneqartorujussuit aammalu Danmarkimi politikkikkut aallussineq Kalaallit Nunaannut tikeraarnerup Qaasuitsup Kommunianut inissinneqarneranut pissutissaqalersitsipput. Tassani borgmesteri Ole Dorph, Isumaginninnermut ataatsimiititaliami siulittaasoq Bendt Kristiansen aamma kommunimi pisortaaqatigiit tikilluaqqusipput kommunertillu ilisaritillugu. Pingaarnertut ilaqutariinnut, meeqqanut inuusuttunullu suliassaqarfiup iluani suliniuteqarfiusut saqqummiullugit.

Danskit ministeriata Karen Ellemann-ip kommunip angissusaa tupigusuutigaa, aammalu kommunimi isorartuumik sineriaqarluni, 30-it sinnerlugit nunaqarfeqartumi 8-inillu illoqarfeqartumi, sumiiffimmi Frankrig-imit anginerusumi inissisimasumi, sullissiviusussaallunilu ineriartortitsiviusussami, tamanna unammilligassaqartitsimmat paasisinnaalluarlugu. 

Ullut aappaanni Namminersorlutik Oqartussat ulloq unnuarlu angerlarsimaffii aamma kommunip Ilaqutariinnut sullissivianut ministerit taakku marluk pulaarput. Tassani atugassarititaasut assigiinngitsut namminneq isiminnik takuaat, Qaasuitsup kommunianilu innuttasunut 17.000-missaaniittunut isumaginninnikkut suliniutit suliniuteqarfiusullu tusagaqarfigalugit.

Suleqatimi Danmarkimeersup Kalaallit Nunaanni pissutsinut soqutiginninnerujussua,
aammalu meeqqat inuusuttullu atugarisaannik pitsanngorsaaniarluni assigiinngitsunik siunnerfilinnik suliniuteqarlutik Naalakkersuisut ataatsimut isigalugu suliaqarnerat, kommunip aamma Namminersorlutik Oqartussat qanimut suleqatigiinnerisigut ingerlanneqartoq, saqqummiussinnaagamiuk, Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen-ip nuannaarutigaa.

Martha Lund Olsen-ip suleqatiminit nersualaarisumik akuersaarneqarnini takoriikkani nuannaarutigisorujussuullugu oqaatigaa, aammalu sammisat allat Qeqertarsuarmi aallartinneqartut  takutinnissai qilanaaralugu.  

Angalaqatigiit angalanerminni ullumi ulloq 31. marts 2016 Qeqertarsuarnut ingerlaqqissapput.

 

Paasissutissanik annertunerusunik piniarnermi attaveqarfigineqassaaq Naalakkersuisup allattaa Hanne Nielsen oqarasuaammut +299  53 93 71.