Suiaaqatigiit katissinnaanerat

Ulloq 01. april 2016 atortuulissapput Kalaallit Nunaanni aappariinnermut inatsisip allannguutai kingulliit. Allannguutit periarfissaqartilissavaat suiaaqatigiit katissinnaanerat, - pisortanit katitsitsinikkut imaluunniit oqaluffimmi.

Ilagiinnut Naalakkersuisoq Nivi Olsen oqaaseqarpoq; "Ulloq taanna sivisuumik utaqqisimavarput. Aappariittut inuusunut amerlasuunut pingaartuuvoq katissinnaaneq, aapparisaq qanoq suiaassuseqarnersoq apeqqutaatinnagu. Taamaattumik nuannaarutigaara Inatsisartut 2010-imi akuersissutigisaat maanna kiisami piviusunngorsinnaalermat."

Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfiup Biskoppeqarfik suleqatigalugu inatsisip allannguutaasa tigussaasumik suliassartai suliarisimavaat, sisamanngornerlu 31. marts Ilageeqarnermut Naalakkersuisup pisortatigoortumik atortussanngortissimallugit ritualit nutaat oqaluffimmi suiaaqatigiit katissinnaaneranni atorneqartartussat.

Naalakkersuisut periarfissat nutaat uummammit tikilluaqquaat, - ilagiillu oqaluffiat peqatigalugu nuannaarutigalugu piffissamut nutaamut piareernerput.

 

Inussiarnersumik Inuulluaqqusillunga

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq

Nivi Olsen

 

Attavissaq: Line Hasselriis, oqarasuaat 345708, email: land@nanoq.gl