Aappariit suiaaqatigiit Kalaallit Nunaanni oqaluffimmi katissinnaalerput

1. april 2016 aallarnerfigalugu aappariit suiaaqatigiit oqaluffimmi katissinnaalissapput. Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq:

Suiaaqatiminnik atoqateqartartut katikkusulernerminni suiaaqatigiinngitsutulli periarfissaqalermata nuannaarutigisorujussuuara. Kikkut tamarmik atoqateqartarnermikkut qanorluunniit inissisimagaluarunik pisinnaatitaaffiisa assigiinnissaat uannut pingaaruteqartorujussuuvoq.

Inatsisip nutaap atuutilinnginnerani inuit suiaaqatigiit, katinnissaminnik kissaateqartut taamaallaat aappariittut nalunaarsorneqarnissamik periarfissaqarput. Maanna inatsisip nutaap atuutilerneratigut oqaluffimmi katinnissaminnut periarfissaqalissapput.

Inatsit ilaqutariinnermut inatsisinut ataatsimoortunut annertuunut, 2015-imi upernaakkut Inatsisartut isumaqatigiissut akuerineqartunut ilaavoq. Tamatuma kingorna inatsisit ataatsimoortut 19. januar 2016-imi Folketingimit akuerineqarput. Inatsisit sinneri 1. juli 2016-imi atuutilissapput.

 

Paasissutissanik amerlanerusunik pissarserusunnermi naalakkersuisup allattaa Elise Uupi Kuitse oqarasuaat 34 54 14-imut imaluunniit e-mail eukl@nanoq.gl aqqutigalugu attaveqarfigineqassaaq.