Nunaqarfinni isorliunerusunilu siunissami illulioriaasissaq pillugu isumasioqatigiinneq iluatsilluartoq

Nunarput tamakkerlugu innuttaasut pitsaasunik pitsaassutsiminnullu naleqquttumik akeqartunik ineqarnissamut periarfissaqarnissaat Naalakkersuisunit annertuumik pingaartinneqarpoq.

-Nunarput tamakkerlugu ineqarnermut suliassaqarfimmi annertoorujussuarnik unammilligassaqarpugut, tamanna inissiaatinut pioreersunut atuuppoq, taamaattorli nutaanik sanaartornermi aamma atuuppoq, assersuutigalugu nutaanik sanaartornermi atortussanik toqqaaneq taakkuninngalu sanaartorneq najugaqartunut akornusiinernik ajoqutissartaasunillu pilersitsisinnaammata. Taamaattumik ineqarnermut suliassaqarfimmi unammilligassat annertoorujussuit taakkua annikillisinniarlugit tulleriissaartumik aaqqissuussaasumik suliaqarnissarput uannut pingaaruteqarpoq, taamak oqarpoq Ineqarnermut Sanaartornermut Attaveqaqatigiinnermullu Naalakkersuisoq Knud Kristiansen.

Tamanna tunngavigalugu nunaqarfinni illoqarfinnilu avinngarusimasuni siunissami illulioriaasissaq pillugu Ineqarnermut, Sanaartornermut Attaveqaqatigiinnermullu Naalakkersuisoq Knud Kristiansen Upernavimmi isumasioqatigiissitsivoq.

Ilaatigut siunertaavoq nunaqarfinni aamma illoqarfinni minnerusuni siunissami illuliortarnermut periarfissat kissaataasullu atuisut, oqartussaasut najukkaneersut  inuussutissarsiortunillu aallartitat peqatigalugit oqallisiginissaat, ilaatigut sanaqateqarluni illuliassanut nutaanut isumassarsiat ilaasa saqqummiunnissaat.

Isumasioqatigiinneq pingaarnernik marlunnik sammisaqarfiuvoq:

  • Nunaqarfinni illoqarfinnilu avinngarusimasuni siunissami inissialiortiternermi unammilligassat takorluukkallu
  • Sanaqataalluni illuliassanik aaqqissuussaq: aaqqiissutissanut nutaanut siunnersuuteqarneq

Isugutammik ajornartorsiuteqarnernik oquillu annertusiartornerannik unammilligassat Naalakkersuisoqarfik aqqutissanik allanik eqqarsalersippaat: illup iluani silaannarmut najugaqartullu peqqissusaannut iluaqutaasumik sanaartornermi periaatsimik inerisaasoqarsinnaava,  sanaartornermik pisariillisitsisumik aammalu isugutammik oquillu annertusiartornerannik ajornartorsiutaarutsitsisumik?

Apeqqut taanna aammalu apeqqutit allat Ineqarnermut Sanaartornermut Attaveqaqatigiinnermullu Naalakkersuisoqarfimmit aallartitanit aamma ilisimatuumit nunaqarfinni aaqqissugaanermut aningaasaqarnermullu tunngasunik paasisimasaqartumit saqqummiinerit tunngavigalugit isumasioqatigiinnermi oqallisigineqarput. Tamatuma saniatigut siunnersortit avataaneersut marluk tamarmik immikkut siunissami sanaqataalluni illuliassap Illorput ilusilersorneqarneranut siunnersuuteqarput.

Knud Kristiansen isumasioqatigiinnerup inernera naammagisimaarpaa, tassungalu atatillugu oqarpoq:

–Isumaqarpunga isummersuutit atorsinnaalluartut isummersuutillu isumatusaarnermik tunngavillit saqqummertut, naalakkersuisooqatikkalu tamanna pillugu ilisimatissavakka.

Paasinartumik isumasioqatigiinnermi avannaarsuani innuttaasut aamma najukkami attaveqarnermi pilersuinermilu ajornartorsiutit arlallit pakatsissutigisatik oqariartuutigaat. Soorunami taakkua oqaaseqaatillu allat tusaatissatut tiguakka, kisianni aallaqqaammut ineqarnermi ajornartorsiutinik aaqqiissuteqarnissamut suliaqarnissaq uannut pingaaruteqarsimavoq, Knud Kristiansen oqarpoq.

Isumasioqatigiinnermi oqariartuutigineqartut nunaqarfinni isorliunerusunilu inissialiortiternerup siunissami ineriartortinneqarnissaanik suliaqarnerup ingerlaqqinnerani Naalakkersuisoqarfiup ilaatissavai. Tamatuma saniatigut sisammik sanaartoriaaseq nutaarluinnaq, isumasioqatigiinnermi saqqummiunneqartoq, aallaavigalugu illunik misiliutaasussanik sanatitsinissaq Naalakkersuisoqarfiup pilersaarutigaa.

Isumasioqatigiinnermi illoqarfimmi innuttaasut ilaasa saniatigut Qaasuitsup Kommunianit qinikkat ataasiakkaat peqataapput.

Miniseminarimut peqataanissamut qaaqqusissut.

Miniseminarimi peqataasut.

Miniseminarimi programmi. 

 

Paasissutissanik annertunerusunik kissaateqaraanni attaveqarfigineqassaaq: Naalakkersuisup allattaa Jensine Berthelsen +299562303 / +299345450 jebe@nanoq.gl