Suliffeqarfiit ilinnartuutillik salliunneqarlik

Pisortat, pisortat suliffeqarfiutaasa suliffeqarfiillu pisortat sinnerlugit sanaartugassanik isumaginnittartut AP 95-imik malinninnissaannik suliffeqarfiillu sanaartornermik suliaqartut ilinniartuutillit salliutinneqartarnissaannik kaammattuut

NUSUKA-p siulittaasua Gerth B. Lynge aammalu Ineqarnermut, Sanaartornermut Attaveqaqatigiinnermullu Naalakkersuisoq Knud Kristiansen ukiup nutaap aallartinneraniit arlaleriarlutik pitsaasumik pissarsiaqarnartumillu, sanaartornerup iluani pissutit assigiinngitsut oqaluuseralugit, ataatsimeeqatigiipput.

Ataatsimeeqatigiinnerit aallaavigalugit sanaartornermi malittarisassat, tamanit akuerisaasut aammalu sanaartornerup iluani kattuffiit akuerisaanni, ulluinnarni AP 95-mik taaneqartartup iluaniittut malinneqarnissaannik aammalu suliffeqarfiit sanaartornermik suliaqartut ilinniartuuteqartut sapinngisamik salliutinneqarnissaannik kaammattuuteqaqatigiissallutik isumaqatigiissutigaat, tamanna tunngavigalugu matumuuna uku kaammattuutigineqarput:

  1. AP 95 tassaavoq sanaartornerup iluani suliaqartut malittarisassaat pingaarnerpaaq. Taamaattumik sanaartornermik suliaqartunit tamanit malineqarnissaa pingaaruteqarpoq, aammalu AP 95 malillugu isumaqatigiissusiarineqarsimasut malinneqarnissaat sanaartortitsisussanit sanaartortussanillu tamatigut isumagineqartariaqarpoq. Matumani pingaartumik tamarmik AP 95 sutigut tamatigut malissagaat kaammattorneqarput, pingaartumik malittarisassat sulianut akiliisarnermut tunngasut malinneqarnissaat kaammattuutigineqarluni, innersuussutigineqarpoq AP 95 malillugu akiligassat akilerneqartarnissaat suliffeqarfiit aningaasatigut pisussaaffiinut aammalu sulisuminnut aningaasarsiaqartitsinerannut assut pingaaruteqarluinnarmat.
  2. Pisortat sanaartortitsisut, matumani ilanngullugit pisortat ingerlatseqatigiiffiutaat aammalu suliffeqarfiit pisortat sinnerlugit sanaartornermik suliassanik ingerlatsisut kaammattorneqarput suliffeqarfinnik sanaartorfigineqartussani najugaqartunik atueqqullugit, taamatuttaaq pisortat sinnerlugit sanaartortitsisut kaammattorneqarput suliffeqarfinnik ilinniartuutilinnik suliariumannittussarsiuussinermi toqqaasaqqullugit. Taamatuttaaq sanaartornermik inuussutissarsiuteqarnerup ineriartortinneqarnissaa eqqarsaatigalugu pissusissamisoorpoq suliffeqarfiit sanaartornermik ingerlataqartut ilinniartuuteqartarnissaminnik isumaginninnissaminnut akisussaassuseqartumik ingerlatsinissaat.

Neriuutigaarput ataatsimoorluta atsioqatigiilluta kaammattuuteqaqatigiinnerput sungiusaatigalugu ilinniarfiusinnaasut amerlisarnissaannut aammalu sulisitsisut nunaqavissut atorluarneqarnissaannut matumani kaammattuuteqarneq suliniuteqaqatigiinnerlu kinguneqarluarumaartoq.

Inussiarnersumik inuulluaqqusilluta

Gerth B. Lynge
Siulittaasoq
Nunaqavissut Suliffiutillit Kattuffiat
Knud Kristiansen
Ineqarnermut, Sanaartornermut Attaveqaqatigiinnermullu Naalakkersusisoq