Nipisanniarneq poorskereerpat aatsaat aallartissaaq

Aalisarnermut, Piniarnermut Nunalerinermullu Naalakkersuisoqarfiup naatsorsuutigaa nipisanniarneq sapaatip akunnerata tulliani aallartikkumaartoq, Nanortallip eqqaani sapaatip akunnerisa 14-inissanni aallartissalluni.

Naalakkersuisoqarfimmit poorskereerpat tusagassiuutitigut ullut aalisalerfiusussat nalunaarutigineqarumaarput.

Naalakkersuisoqarfiup aalisarnermut immikkoortortaata ilisimatitsissutigaa nipisanniarnissamut akuersissutit maannamut 200-t tunniunneqalereersimasut.

Aalisarnermut immikkoortortap naatsorsuutigaa kujataani aalisartoqarsimalereerpat avannaata ingerlatsinermut aqutsisoqarfiini aalisarneq aallartikkumaartoq.

Naatsorsuutigineqarluni Qeqertarsuup Tunuani nipisanniarneq apriilip qiteqqusimalernerani, sapaatip akunnerisa 16-inissaanni aallartissasoq.

2015-imi nipisanniarnissamut akuersissuteqartut 400-t sinneqarput.

Nipisanniarnermi malittarisassat nutaat 2015-inimi atuutilerput. Kitaata sineriaani aqutsiveqarfiit maannakkut arfineq marluussapput. Aqutsiveqarfiit ataasiakkaarlugit pisassinneqassapput, taakkunani ulluni amerlanerpaani 47-ni aalisartoqarsinnaassalluni.

Aalisarneq kingusinnerpaamik ullut aalisarfiusut 47-t nallerneqarpata unitsinneqassaaq. Aqutsiveqarfimmut pisassiissutigineqartut ullut taakku nallertinnagit aalisarneqarpata aalisarneq unitsinneqassaaq.

Sumiiffinni aalisartut peqatigiiffiisa tunitsiviisalu isumaqatigiissutigissavaat aqutsiveqarfimmi aalisalernissaq qaqugu aallartinneqassanersoq.

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl