Bruxelles-imi Sinniisoqarfimmut pisortamik toqqaaneq

Nunanut Allanut Pisortaqarfik aalajangerpoq cand.mag. Mininnguaq Kleist Bruxelles-imi sinniisoqarfimmi pisortatut atorfinitsinniarlugu. Sinniisoqarfimmi pisortatut atorfik ulloq 1. april 2016 inuttaaruppoq, tassami Lida Skifte Lennert ulloq taanna Københavnimi sinniisoqarfimmi pisortanngorluni atorfinimmat.

Mininnguaq Kleist 2013-imi septembarimili Naalakkersuisut Siulittaasuata Naalakkersuisoqarfiani pisortatut (pisortaanermut tullersorti) sulivoq. Tamanna sioqqullugu Mininnguaq Kleist-ip Nunanut Allanut Pisortaqarfimmi immikkoortortaqarfimmi pisortatut aamma allaffimmi pisortatut atorfeqartarpoq. Tamatuma saniatigut Mininnguaq Kleist 2007-2009-imi taamanikkut Naalakkersuisut siulittaasuata allattoqarfiani namminersornermut allaffimmi immikkoortortaqarfimmi pisortatut atorfeqarpoq.

Namminersorlutik Oqartussat nunani allani kiffartuussisarneranni atorfinitsitsisarneq pillugu Namminersorlutik Oqartusssat nalunaarutaat nr. 13., 12. november 2013-imeersoq naapertorlugu, atorfik Namminersorlutik Oqartussat qitiusumik allaffeqarfianni sulisunut suliffiup iluani allagarsiissutigineqarpoq. Kalaallit Nunaata Sinniisoqarfiani sinniisoqarfimmi pisortatut atorfimmut qinnuteqaatit pingasut tiguneqarput.

Annertunerusunik paasisaqarniarluni attaveqarfissaq: Nunanut Allanut Pisortaqarfimmi pisortaq Kai Holst Andersen: +299 55 33 31