Tamanut ammasumik oqallitsitsineq

Stemningsbillede af Indlandsisen

Issittoq nunanullu allanut tunngassutilinnik tamanut ammasumik oqallitsitsinissamut aggersaaneq

Ataasinngornermi aprilip sisamaani nalunaaqutaq marluniit sisamap tungaanut Katuami inersuaaqqami qallunaat nunanut allanut ministeriaqarfiat tamanut ammasumik oqallinnissamut aggersaavoq:

Kunngeqarfiup Danmarkip nunanut allanut sillimaniarnermullu nassuiaatissami maanna ingerlanneqartumi danskit naalakkersuisut nassuiaasussaata naalagaaffinni allani aallartitap Peter Taksøe-Jensenip Kalaallit Nunaat tikeraassavaa, tassani Kalaallit Nunaanni innuttaasut aalajangiisartullu isumaat tusariartorlugit. Tassungalu atatillugu kunngeqarfiup issittumi 2030 tikillugu iliuusissaa isikkivimmit allamit isigalugu inissisimanera pillugu tamanut ammasumik oqallitsitsisoqassaaq.

Oqaluuserisassat:

  1. Inuussutissarsiornermut, Suliffeqarnermut Niuernermut Nunanullu Allanut Naalakkersuisuni ilaasortaq Vittus Qujaukitsoq ammaassaaq
  2. Issittumi aallartitamit Erik Vildstrupimit naatsumik saqqummiineq
  3. Naalagaaffinni allani aallartitaq danskillu naalakkersuisuisa nassuiaatitaata saqqummiinera
  4. Inersuarmit apeqqutit oqaatigiumasallu
  5. Naggasiineq

Kunngeqarfiup nunanut allanut kiinnernissaanut Naalagaaffeqatigiinneq nunallu avannarliit naalagaaffeqataasut pingaaruteqarluinnarput. Issittoq pillugu Kunngeqarfimmi qanimut suleqatigiilluarnissap ingerlaannarnissaa pisariaqartinneqarpoq, tassani issittumi ineriartornerup sunniuteqarfiginissaa siunertaalluni, tamannami Kunngeqarfimmut Danmarkimut Kalaallillu Nunaanni innuttaasunut iluaqutaassammat. Sikup aakkiartornera ilutigalugu nunarsuarmioqatigiit issittumut Kalaallillu Nunaannut soqutiginninnerat alliartuinnarpoq, nunallu allat issittumi najuunnertik annertusiartuinnartippaat. Ineriartorneq tamanna qanoq ililluta issittumi siunissaq pillugu eqqissisimasumik, aningaasaqarnikkut avatangiisitigullu atuilluarnissaq eqqarsaatigalugu kivitseqataaffigisinnaavarput? Annertunerujartuinnartumik ukkatarineqalerneq soqutigineqarnerulernerlu qanoq ililluta kalaallit nunaanni innuttaasunut pitsaasup tungaanut saatseriarsinnaavarput?

Aaqqissuussineq aprilip sisamaani nalunaaqutaq marluniit sisamap tungaanut Katuami inersuaaqqami tamanut ammasumik ingerlanneqassaaq. Qallunaatuumit kalaallisut nutserisoqassaaq. Kaffillerlutalu kaagillissaagut. Iserneq akeqassanngilaq, nalunaarnissarli pisariaqarluni uunga allannikkut nap@nanoq.gl tamannalu kingusinnerpaamik tallimanngornermi apriilip aallaqqaataani ullup qeqqanut pissaaq.

Nassuiaaneq pillugu: Septemberimi 2015-mi danskit naalakkersuisui nunanut allanut politikki pillugu nassuiaanissamik pilersititsipput, taannalu naalagaaffinni allani aallartitamit Peter Taksøe-Jensen-it siuttuuffigineqarpoq. Nassuiaanissami 2030-ip tungaanut nunanut allanut politikkissaq pillugu suliassaqarfiit pingaarnersiornissaat tikkuunneqassaaq. Tassuunattaaq nunanut allanut politikki, isumannaallisaanermi politikki, illersornissamut politikki, ineriartornissamut politikki, niuernermut politikki inuussutissarsiornikkullu siuarsaataasinnaasunik ataatsimut eqqarsaatigisanik pitsaanerusumik suliniutaasinnaasunik nassuiaat tikkuussissaaq. ”Suliap nassuiarnerani issittumi ineriartornermi annertusiartuinnartumik aningaasaqarnikkut sillimaniarnikkullu pingaaruteqarnera ersersinneqassaaq”, tamannalu nassuiaammi qitiusumik siuarsaanissamut iliuusissat arlallit ilagaat. Nalunaarusiaq tamakkiisoq maajip aallaqqaataani 2016 naammassereersimassaaq.

Oqallitsitsinermit videoliaq uani takuuk.

 

Annertunerusumik paasisaqarusukkussi attavigisinnaavarsi: Nunanut allanut pisortaqarfimmi pisortaq Kai Holst Andersen: +299 55 33 31