Ullumi Bruxelles-imi qaartartumeerinerit

flag

Ullaaq manna ullaaralaat arlalinnik imminnut attuumassuteqanngitsunik Bruxelles-imi saassussisoqarpoq.

Bruxelles-imi mittarfimmi aammalu Bruxelles-imi EU-p sullissiviisa aammalu Kalaallit Nunaata Sinniisoqarfiata qanitaanni metroqarfimmi qaartartumeerinerit kingunerisaannik minnerpaamik 25-it toqutaasimasorineqarput aammalu 135-it sinnerlugit ikiligaasoqarluni.

Bruxelles-imi Kalaallit Nunaata Sinniisoqarfiani sulisut tamarmik ajunngillat, aammalu isumannaallisaanermi inissisimanertik Danmarkip sinniisoqarfiata siunnersortaannut qanimut ataqatigiissaarlugu.

Kalaallit Belgien-imiittut nukinginartumik pisariaqartitsilerunik Danmarkip nunanut allanut ministereqarfiata nunarsuarmi nakkutiginnittoqarfia uani + 45 33 92 11 12 / bbb@um.dk attaveqarfigissagaat siunnersorneqarput.

Piffissami aggersumi arlalinnik saassusisoqarnissaa mattunneqarsinnaanngilaq. Belgien-imi ajortumeeriniat saassusseqqinnissaannut upalungaarsimanerup annertussusaa ullaaq manna aatsaat taama annertutigilerlugu inissinneqarpoq. Nalunaarutigineqarpoq Frankrig-imut aamma Holland-imut killeqarfiit matuneqartut.

Vittus Qujaukitsoq oqarpoq:

”Kalaallit Nunaanni uagutsinnut nutaarsiassat aalassannarput. Eqqugaasut ilaqutaallu eqqarsaatitsinniipput. Bruxelles-imi Sinniisoqarfitsinni sulisuvut, ullaaq manna sumiiffiit saassussivigineqartut saninnguanniittut, ullumi eqqarsaatigaakka.

Sulisuvut ajoqusersimanngimmata eqqissiallappunga, aammalu ulluni aggersuni immikkut immitsinnut paarilluassasugut kaammattuutigaara.”

Annertunerusunik paasisaqarniarluni attaveqarfissaq: Nunanut Allanut Pisortaqarfimmi pisortaq Kai Holst Andersen: +299 55 33 31