Arctic Circle Greenland Forum

Arctic Circle Greenland Forum 17.-19. maj 2016 ingerlanneqassaaq - Katuami, Nuummiittumi kikkut tamamik peqataanissaat ammatinneqarpoq

Arctic Circle Greenland Forum Naalakkersuisut suleqatigalugit aaqqissuunneqarpoq – aammalu issittumi innuttaasunut aningaasaqarnikkut ineriartortitsineq sammineqarluni. Forum kulturip illorsuani Katuami Nuummi 17.-19. maj 2016 ingerlanneqassaaq.

Islandip præsidentia, Ólafur Ragnar Grímsson aamma Naalakkersuisut siulittaasua Kim Kielsen, forum-imi ammaasuussapput. Issittumi inuussutissarsiortut pillugit ataatsimiinnerit oqaluuserisassani ilaatinneqassapput: takornariartitsisarneq, umiarsuarmik nassiussalerineq, timmisartumik angallanneq, pinngortitap pisuussutai kiisalu aalisarneq aamma pisuussutit uumassusillit. Ataatsimiinnerni allani Issittumi aningaasaliisarnerit ilusaat, Issittumi nunap inoqqaavisa nukittorsarneqarnissaat, peqqissuseq atugarissaarnerlu, ilisimatusarneq nutaaliornerlu kiisalu najukkami inuiaqatigiinnut IBA-mut (Impact Benefit Agreements) isumaqatigiissutit sammineqassapput.

Oqalugiartussat peqataasussallu issittumi nunaneersuut, Europa-meersut aamma Asien-imeersut tassaassapput politikerit siuttuusut, inuussutissarsiortunit kattuffinnillu allartitat, ingerlatseqatigiiffiit aningaasaliisartut, ilisimatusarfiit aamma nunap inoqqaavisa siuttuutitai. Peqatigisaanik ”Issittumi aamma issittumi innuttaasunut tunngatillugu ilisimatusarneq nutaaliornerlu” pillugu aaqqissuussineq Ilisimatusarfimmi forum-ip ingerlanneqarnerani ulloq kingulleq ualinerani ingerlanneqassaaq.

Arctic Circle Greenland Forum, forum-it Island-ip avataani Arctic Circle-mit ingerlanneqartut tulleriit pingajussaraat. Forum siulleq 2015-imi aggustimi Alaska-mi ingerlanneqarpoq, tullialu 2015-imi novembarimi Singapore-mi pivoq.

Arctic Circle Forum, Nuummi ingerlanneqartussaq kikkunnut peqataanissamut soqutiginnittunut tamanut ammavoq: politikerit, aallartitat atorfilittallu, inuit ilinniarsimasaminnik suliaqartuq, ilinniartut, innuttaasut soqutiginnittut, ilisimatusartut, pisortani pisortat, namminersorluni atorfeqartut, tusagassiortut allallu Issittumi siunissamut soqutiginnittut.

Nalunaarsuineq ingerlanneqarpoq nittartagaq una aqqutigalugu www.arcticcircle.org.

Arctic Circle pillugu
Arctic Circle Island-imi Reykjavik-imi ukiut tamaasa oktobarimi ukiumoortumik ilaasortaminik ataatsimeersuartitsisarluni Issittumi nunarsuarmi katersuuttarfiusut annersaannik pilersitsisuuvoq. Reykjavik-imi 2015-imi ataatsimeersuarneq nunanit 50-init amerlanerusuneersunik 2000-it sinnerlugit peqataaffigineqarpoq. Arctic Circle tassaavoq issittumi pissutsit pillugit oqallinnissamut suleqatigiinnissamullu naapittarfik ammasoq oqartussaaqatigiiffiusorlu.

Paasissutissat annertunerusut takukkit uani www.arcticcircle.org.

Apeqqutissaqarnermi attaveqarfissaq:

Arctic Circle Allattoqarfia: Sigríður Blöndal, sigridur@arcticcircle.org, +354 868 6598

Nunanut Allanut Pisortaqarfik: Kai Holst Andersen, kaoa@nanoq.gl, +299 55 33 31