Nunaqarfiit peqqissaaviini assigiinnerusumik sullissineq

Naalakkersuisut niviarsiat immikkut nunaqarfinnik sullissisut amerlanerusut kissaatigaat

Peqqissutsimut Naalakkersuisoq Doris Jakobsenip Kalaallit Nunaata sineriaa tamakkerlugu nunaqarfinni peqqinnissaqarfiup immikkoortortaani sulisut tamaasa nuannaarutigai. Nunaqarfinni innuttaasut tamarmik assigiimmik sullinneqarnissaat Naalakkersuisut kissaatigaat. 

Nipaa tusaruk.

Doris Jakobsen:

- Nunaqarfippassuit peqqissaavii ilinniarsimanngitsunik, kisianni pikkorissunik ukiorpassuarni ingerlallatsilluartunik sulisoqarput. Kisianni avannaani Uummannami Qeqertarsuullu Tunuani takuakka niviarsiat immikkut nunaqarfinnik sullissisut nunaqarfiit peqqissaaviini sulisunik pikkorissaasartunik, taamaalillutik nunarfiit peqqissaaviini sulisut piginnaasassanik assigiinngitsunik tuniorarneqartarput. Nakorsamit suliarineqaqqaartariaqanngitsut soorlu kapisisinnaanerit, aaviisinnaanerit kilernernillu mersorsinnanerit aamma pikkorissaassutigineqartarput.

Ungasiaaniit internet atorlugu nakorsiartitsinermut attaveqaatip ‘Pipaluk’p atornissaa aamma pikkorissaatigineqartarpoq.

- Taamatut pikkorissaasarnerit nunatta sinnerani amigaataammata, nunarput tamakkerlugu periarfissaalernissaat anguniarpara, Doris Jakobsen naqissusiivoq.

Nunaqarfiit peqqissaaviini sulisut piginnaasaqarnerulernerat aningaasanik sipaarnermik kinguneqassaaq, Doris Jakobsen oqarpoq:

- Nakorsiat sapinngisamik nunaqarfitsik qimaqattaanngikkaluarlugu ikiorserneqarsinnaanissaat siuarsagassaavoq. Tassuuna aningaasanik siunissami sipaarneq anguneqassaaq.

Peqqissaasut ilinniarsimasut

Doris Jakobsen:

- Nunaqarfinni aqutsisunit paasitinneqarpunga peqqissaavinni sulisut ilaasa piginnaasaat qaffassarneqartariaqartut. Assersuutigalugu kilernernik mersorsinnaanerit kapisisinnaanerillu ilinniarneqartariaqarput, pingaartumik pinasuartumik pisoqartillugu pisariaqartaraluartut. Aamma ungasianiit nakorsiartitsinermut attaveqaatip ‘Pipaluk’-p atornissaa ilaasa ilinniartariaqarpaat.

Ullumikkut ‘Pipaluk’ atorneqalerneratigut assersuutigalugu Ilulissani nakorsaq nunaqarfimmiunik nakorsiartitsisinnaavoq.

Nunaqarfiit peqqissaaviini sulisunik piginnaanngorsaaneq Avannaata immikkoortuani aallartereerpoq, tassanimi niviarsianik immikkut nunaqarfinnik sullissisunik sulisoqarmat.

- Piginnaanngorsaaneq avannaani, kujataani tunumilu ingerlanneqarnissaa anguniarpara niviarsiat nunaqarfinnik sullissisut amerlanerulersinneratigut, Doris Jakobsen oqarpoq.