Ikorfartuisunut akissarsiat pitsaanerusut

1. april 2016-imi ikorfartuisut pillugit nalunaarut nutaaq atuutilissaaq.

Inuk pinerluttulerinermut inatsimmik annertuumik unioqqutitsisimasutut pisuutinneqaraangami, unnerluutigisaagaangami pineqaatissinneqaraangamiluunniit ikorfartuisoqarnissaq pisinnaatitaaffigaa. Suliap eqqartuussivimmi suliarineqarnerani aammalu tigummisaanermi illersuisup pineqartumik tapersersuinissaq suliassaraa.

Ikorfartuisut akissarsiaat siusinnerusukkut isornartorsiorneqartarsimapput, Kalaallit Nunaanni ikorfartuisut Danmarkimi illersuisunit akissarsiakinnerummata. Nalunaarut nutaaq atuutilerpat Kalaallit Nunaanni aamma Danmarkimi illersuisut akissarsiaat assigiilissapput. 

Nuannaarutigaara, Kalaallit Nunaanni ikorfartuisunut atugassarititaasut Inatsisinik Atuutsitsinermut Ministereqarfimmit aallunneqarmata, aammalu Kalaallit Nunaanni suliaminnut, Danmarkimi ikorfartuisunut akissarsiarititaasut amerlaqataannik akilerneqartartussanngormata. Pitsannguineq tamanna pitsaasuuvoq, tassami ikorfartuisut Naalagaaffeqatigiit iluanni sumiluunniit suligaluarunik akissarsiaat assigiinngittariaqanngillat”, Pinngortitamut, Avatangiisinut Inatsisinillu Atuutsitsinermut Naalakkersuisoq, Mala Høy Kúko, oqarpoq.

Mala Høy Kúko itisiliivoq: ”Kalaallit Nunaanni ikorfartuisut sulinerminni atugaannik pitsanngorsaaniarluni suliniuteqarneq ingerlateqqinneqarsinnaavoq ingerlateqqinneqassallunilu. Suli pissutsinik pitsannguinissaq annertuumik pisariaqartinneqarpoq. Sulisussarsiortarneq, ilinniartitaaneq ataqatigiissaarinerlu pitsaasuussapput. Ikorfartuisunik nutaanik atuilernissamut periarfissat pitsaanerusariaqarput, aammalu inatsisitigut ilitsersorneqarnissamut ikorfartuisullu akornanni suleqatigiinnissamut periarfissat pitsaanerusariaqarlutik”.

 

Annertunerusumik paasisaqarusunnermi attavissat: Naalakkersuisup allattaa Elise Uupi Kuitse, oqarasuaat 34 54 14, imaluunniit immikkoortortaqarfimmi pisortaq Karen Anne Arleth, oqarasuaat 34 54 65