Qaasuitsup Kommuniani isumasioqatigiinneq

Qaasuitsup Kommuniani isumaginninnikkut ajornartorsiutit unammillerneqartarnerat pillugit isumasioqatigiinneq

Naligiissitaanermut Isumaginninnermullu Naalakkersuisup Martha Lund Olsen-ip peqataaffigisaannik ulluni 17. – 18. marts 2016-mi Aasianni suleqatigiiutigaluni isumasioqatigiissitsinermik ingerlatsisoqarniarpoq. Isumasioqatigiinneq Ilaqutariinnermut, Naligiissitaanermut Isumaginninnermullu Naalakkersuisoqarfiup aaqqissuussaraa. Isumasioqatigiinneq Qaasuitsup Kommuniani isumaginninnikkut ajornartorsiutit annertuut qaqilersorneqarnissaat aaqqiiviginiarnissaalu siunertaralugu aaqqissuussineruvoq.

Isumasioqatigiinnermi eqqartorneqassapput kommunimi aalajangiisartut allaffissornikkullu sulisuusut peqatigalugit unammilligassat qanoq anigorniarneqarsinnaanersut, tamatumanilu eqqartorneqassalluni allaffissornikkut ingerlatsinermi unammilligassat oqartussaaffiit assigiinngitsut suleqatigiinnerisigut qanoq naapertuunerpaamik ilusilersuiffigineqarsinnaassanersut.

Isumasioqatigiinnermi Qaasuitsup Kommunia sinnerlugu peqataassaaq borgmester Ole Dorph, kommunimi isumaginninnikkut ataatsimiititaliami ilaasortat, Qaasuitsup Kommuniani isumaginninnikkut immikkoortortaqarfinnilu allani pisortat aammalu kommunimi ingerlatsinermi susassaqartut assigiinngitsut.

Isumasioqatigiissitsineq iluatsillugu Martha Lund Olsen-i Aasianni innuttaasunik ataatsimiissitsiniarpoq, tamannalu pissaaq ulloq 16. marts 2016 nal. 19.00 Katersortarfimmi.

Annertunerusumik paasissutissanik Naalakkersuisut allatsi Hanne Nielsen attavigineqarsinnaavoq uunga 346604 imaluunniit e-mail: hani@nanoq.gl