Sanaartornermut Naalakkersuisumut allakkannut ammasumut akissut

Aallarniutigalugu nunatta tunniussinnaasaanik aallaavilimmik atortoqarluni sanaartortoqarnissaanut tunngasumik ammasumik allagaqarnerit qujassutigaara. Qularnaatsumik oqarfigisinnaavakkit Naalakkersuisunit annertuumik soqutigalugulu aallukkatsigu aammalu suliniutit suulluunniit atortussanik avataaniit eqqussuinermut annikillisaataasinnaasut tikilluaqqungaarlutigit. Tamanna atuuppoq, sanaartornermi atortussat nunatsinni pinngortinneqartut pineqarpata, imaluunniit ikkussoriaannanngorlugit sanaartornermi atortussat inerisarneqartut, nunatsinni suliffissaqartitsinermut iluaqutissiisinnaasut, pineqarpata.

Tamatumunnga ilutigitillugu Naalakkersuisunit annertuumik eqqumaffigaarput sanaartornerup iluani periaatsit atuisussanut pitsaassutsimik annerpaamik qulakkeerinnittut suleriaatsitut atuutsinneqarnissaat aqqutissiuuttuassallugu, taamatuttaaq pingaartumik illuutini inissianilu oqummik pilersoqartarnera pinaveersaartinniarlugu suliniutit ilanngullugit. Matumani aamma pingaaruteqarpoq sanaartornerup ingerlanerani tamatumalu kingorna sanaartukkat atuutsinneqalereernerini inuiaqatigiit nammassinnaasaannik aningaasatigut inissisimasoqarnissaa qulakkeersimassallugu.

Qularnaatsumik oqarfigisinnaavakkit, Inatsisartut ukiakkut 2015-mi ataatsimiinnerminni apeqquteqaat aallaavigalugu oqallinnerminni ataatsimoortumik isumaqatigiissutigisaat aallaavigalugu Naalakkersuisut sulimmata. Matumani ilanngullugu ilisimatitsissutigisinnaavara, illuliassat katiteriaannanngorlugit betonimik nunatsinni tunisassiarineqartunik sanaartortoqarnissaanik aammalu aserfallatsaaliugassaanngitsunik saqqaqartussanik isumassarsiaq suli sulissutigineqarmat ineriartortinneqarlunilu. Suliniutip inerneriniartussaavaa siunissami sanaartornerup iluani nunatta tunniussinnaasaanik atuinermik annertusisitsiartuaarneq – taamaalillunilu sanaartornermut atortussanik avataaniit pisariaqartitsineq eqqussuinerlu annikillisarneqartussaalluni –  aammalu sanaartukkat inernerisa pitsaassusaannik qaffassaataasussaassalluni.

Soorlu apeqquteqaat aallaavigalugu oqallinnermi matumani innersuussutigineqartumi oqaatigineqareersoq, piffissami matumani Qaqortumi inissiat aqqaneq marluk betoninik katiteriaannarnik aallaaveqarluni misiliutitut sanaartorneqarnerat ingerlanneqarpoq. Misileraalluni sanaartortoqartarnerani pisartoq matumani atuuppoq, tassalu piffissamik pilersaarummik naapertuiniarneq unamminartoqarpoq, taamaattorli ilisimatitsissutigisinnaavara pilersaarutaammat 2016-ip naannginnerani suliamik tunniussineq pissasoq pilersaarutaammat. Misilittakkanik katersinissaq siunertaralugu Nunani Avannarlerni Killerni katiteriaannarnik illussanik tunisassiorfiit atassuteqarfigineqarput.

Allakkanni toqqarlugu oqaatigivat Sikublock-imik atuineq, taannalu ukiorpassuarni ineriartortinneqarsimasoq, taamaammallu nunatsinni sanaartornerup iluani atortussatut nunatta tunniussinnaasaanik aallaaveqarnerarlugu. Sikublock ukiut arlallit matuma siorna isumalluarnartumik angusaqarsimavoq, taamaattorli tunisassiorneq ukiut arlaqanngitsut ingerlanerini unitsinneqarsimavoq. Naalakkersuisunit isumaqarpugut Sikublockimik aallaaveqarluni sanaartortoqarsinnaanera pitsassuusinnaasoq iluaqutissarpassuaqarsinnaasorlu, assersuutigalugu attartussusaa pitsaavoq, nukissiuutinik atuinikinnerunissamut iluaqutissartaqarpoq, isumannaallisaaneq pitsaasuuvoq aammalu minnerunngitsumik qarmasissianik pisariitsumik sanaartorsinnaaneq periarfissaalluni. Taamaattorli periaaseq taanna – allatulli aamma – akornutaasinnaasunik peqarpoq, soorlu assersuutigalugu piffissap sivikitsuaqqap iluani sanaartortoqarsinnaavoq, silap masannartuliunnginnissaa pisariaqarpoq, marraq qarmakkat katiterutaat aammalu cementi pisariaqartinneqarput nunatsinnut eqqussuutissallugit. Taamaalilluni pisariaqarpoq qarmasissiamik taassuminnga periaatsimik tunisassiornermillu ineriartortitseqqinnissaq, ullumikkullu ineriartortitsinernut taamaattunut aningaasatigut tapersersuisinnaanermik aaqqissuussinerit toqqagassat  assigiinngitsut arlalissuupput.

Aallarnisaasunit kinguneqarluartussatut iliuuseriumaneqartunut Naalakkersuisunit tusarnaarusussuseqarluarpugut, aammalu namminersorlutik niuernikkut ingerlatsiumasunut tapersersuerusussuseqarluarput, soorlu oqaatigineqareersutut taperseeriaatsit assigiinngitsut aqqutigalugit. Naalakkersuisunit peqataasinnaavugut sanaartornikkut atortussanik attanneqarsinnaasunik tunisassiortoqarnissaanut siuarsaaqataassalluta aammalu taakku nunatsinni siammarterneqarnissaannut, taamaattorli aamma piumasaqaataavoq isumassarsiap naammassillugu suliarineqarsimanissaa.

Namminersortut aammalu Kommunit suleqatigiissinnaapput taamaalillutillu atortussanik periaatsinillu ineriartortitseqatigiillutik, assersuutigalugu sanaartugassanut Namminersorlutik Oqartussanit aningaasaleeqataaffigissallugit akuerineqarsimasunut. Matumani assersuutigineqarsinnaavoq Nanortalimmi utoqqaat illuat.

Naggataatigut ilisimatitsissutigisinnaavara, Kommune Kujallermit saaffiginnissut alla piffissaagallartillugu akineqarsimanngitsoq akissutissaa suliarineqarmat sapaatillu akunnerata matuma ingerlanerani akineqarumaarluni. Tassani pineqarpoq Inuussutissarsiornermut Ataatsimiititaliap saaffiginnissutaa, ilisimatitsissutigisinnaavarali saaffiginnissut aallaavigalugu suliniummi qarmasissiat Sikublockit atorneqarsinnaanissaat isumaliutigineqarpoq.

 

Inussiarnersumik inuulluaqqusillunga

Knud Kristiansen