WWF-mit paasinerlunneqarpunga

Verdensnaturfondip (WWF) nunatsinni sinniisua Kaare Winter Hansen KNR.gl-mut marsip qulinganni oqarpoq Qaanaami qaleralinnut tunitsiviliortitsissallunga pilersaaruteqartunga, tamatumalu sananeqarnissaanut kissaateqarlunga erseqqissaasimasunga.

Eqqunngilluinnarporli.

Aajuku allaatigisaanni marsip aappaanni 2016-imi saqqummersumi oqaatigisakka, Kaare Winter Hansenimit maluginiarneqarsimanngitsut:

“Isumaqarpunga qalerallit tunineqartartut suli amerlanerujussuanngortinneqarsinnaasut, aalisarneq qalerallillu tunisassiarineqartartut pillugit pitsaasumik pilersaarusiorneqarpat.”

“Qaanaami qaleralinnut tunitsivik Royal Greenlandimit pigineqarpoq, tunitsivimmi qerititsiviit Inughuit A/S-mit pigineqarlutik. Nunatsinni inuussutissalerinermut oqartussaaffiup innersuussutai naapertorlugit neqit aalisakkallu tunitsivimmi ataatsikkut tunisassiarineqarsinnaanngillat.

Piginnittuusut kaammattorusuppakka mattannik qilalukkallu neqaannik suleqatigiillutik tunisassiuleqqullugit. Aalisakkat panertut aamma tunisassiarissagaat, ingammik qullukkiat.”

Oqaatigisama takutippaat oqaatsimik ataatsimilluunniit oqannginnama Qaanaami tunitsiviliortitsiniarlunga. Akerlianik Qaanaami tunisassiorfimmik piginnittuusut kaammattorpakka mattannik qilalukkallu neqaannik tunisassiulernissamut suleqatigeeqqullugit.

WWF-ip nunatsinni sinniisua kaammattorusuppara Qaanaami, tamatumalu nunaqarfittaanut pissutsinut qanimut takuniaajartoqqullugu,  uparuartuiinnarani taavani pissutsit takulluarniassammagit.

 

Inussiarnersumik inuulluaqqusillunga

Aalisarnermut, Piniarnermut Nunalerinermullu Naalakkersuisoq, Karl-Kristian Kruse.

 

 

Attavigineqarsinnaavoq Aalisarnermut, Piniarnermut Nunalerinermullu paasissutissiisartoq Ludvig Siegstad Mail: lusi@nanoq.gl