Sex-Inuk aallartilluarpoq

Paasititsiniaaneq Sex-Inuk ” Imminut paarigit – usuup puua atoruk”, Kalaallit Nunaanni imminut paaraluni atoqatigiittarnissamik kaammattuuteqartoq ingerlallualereerpoq, pingaartumik illoqarfinni ilinniarfeqarfinni inuusuttorpassuarnillu najorneqartuni, Ilulissani, Sisimiuni Nuummilu. Peqqissutsimut Naalakkersuisup Doris Jakobsenip Peqqissutsimut Naalakkersuisoqarfiup paasisitsiniaanermut suleqataanera oqaluttuaraa.

Nipaa tusaruk.

Doris Jakobsen:-Inuusuttorpassuit kinguaassiuutitigut nappaatinik tunillanneqarsimasut amerlasoorujussuupput, ingammik 16-ininngaannit qummut ukiullit. HIV-mik tunillaassuunneq 50-it missaanni ukiullit akornanni siornagut atuunnerusimasoq inuusuttuaqqat akornanni piffissami kingullermi  ajoraluartumik aamma tunillaassuutileriartortoq takuarput. Syfilisimik tunillaassuunneq aamma taamaappoq. Gonorremik klamydiamiallu tunillanneqarsimasut 3000-init amerlanerulermata immikkut iliuuseqartariaqaleratta nammineq piumassutsiminnik suliniuteqartut Sex-Inuk suleqatigalugit paasititsiniaaneq aallartipparput. Ilaatigut Facebook atorlugu aamma paasitsitsiniaavugut. Tamatuma saniatigut Peqqinnissaqarfimmi sulisut, politikerit inuillu inuiaqatigiinni tusaamasat T-shirtinik tunioqqarneqarput saqqumilaartillugu atortagassaannik.

Usuup puunik akeqanngitsunik agguaasoqarpoq.

Doris Jakobsen:- Usuup puui illoqarfinni Ilulissani, Sisimiuni Nuummilu taxani ilaasunut akeqanngitsumik agguaanneqartalerput. Usuup puuinik atuinissaq taxat issiaviinut nivinngarlugu nittarsaanneqarpoq. Usuup puui akeqanngitsut sinerissamut tamarmut aamma siammarterneqassapput. Paasititsiniaaneq bussini plakatitut aamma nittarsaanneqarpoq.

Imminullu paaraluni atoqatigiittarnissaq pillugu paasititsiniutit quppersagaaqqat aamma siammarteqarput.

Doris Jakobsen:- Meeqqat atuarfiini ilinniarfinnilu kinguaassiuutitigut nappaatit pillugit ukiorpassuanngortuni paasititsiniaasarnerit maannamut ingerlanneqartuartaraluartut kinguaassiuutitigut nappaatinik tunillaassuunneq annikilliartorsimanngilaq.

Paasititsiniaaneq maannamut qanoq ingerlava?

Doris Jakobsen:- Tassa malunnarpoq soqutigineqartorujussuusoq, Sex-Inuk-ip Facebookimi quppernera nuannarinnitserpassuaqarpoq saqqummiunneqartullu kammalaatinut allanut ingerlateqqinneqartarput. Soorunami neriuutigaara paasititsiniaaneq iluaqutaassasoq inuit ilaat ilaatigut imigassartorsimatillutik imminullu paarinissartik puigorlugu atoqateqartarmata. Ullumikkut gonorremik klamydiamillu tunillanneqarsimasut amerlavallaarujussuarput kiisalu HIV-mik syfilisimillu tunillanneqartartut inuusunneruleriartornerat ernumanartoqarmat assorujussuaq kaammattuutiginarpoq inuusuttut imminnut illersornerunissaat.

Paasitsiniaalluni siammarterinermik ingerlatsisuupput Sex-Inummik suliniuteqartut peqqissaasunngorniat suleqatigalugu aningaasaliisoq Peqqissutsimut Naalakkersuisoqarfik.

Sex-Inuk nittartagaraa: http://imcc.dk/aktiviteter/sexinuk/

peqqik.gl-imi Sex-Inuk pillugu aallaaserisaq: Imminut paarigit - usuup puua atoruk.