Qeqqata Kommunialu isumaqatigiissut nutaaq

Naalakkersuisut Qeqqata Kommuniatalu suleqatigiinnissamut isumaqatigiissutaat nutaaq

Ullumikkut ulloq Naalakkersuisunut Qeqqata Kommunianullu nuannaarfiuvoq. NAKUUSAp suliniutaanut nutaamut ”Uagut ulluinnarput uagut niperput” Qeqqata Kommuniata  suleqatigiinnissamut isumaqatigiissut ukiuni pingasuni atuuttussaq atsiorpaa, sivitsorneqarsinnaasumik.

”Uagut ulluinnarput, uagut niperput” tassaavoq NAKUUSAp suliniutaa nutaaq, tassaniissapput Meeqqat Isummersorfii kommunini sisamaasuni, Nakuusaaqqallu atuarfinni tamaginni pilersinneqassapput. Kommunini Meeqqat Isummersorfii inuusuttuaqqanit 13-18-it tungaanut ukiulinnut inuttaqassapput, taakkulu kommunalpolitikerinut Inatsisartunullu siunnersuuteqartartussaallutik.  Atuarfinni Nakuusaaqqat atuartut annerniit inuttaqartinneqassapput, taakkulu nunatsinni meeqqat tamaasa sinnerlugit oqariartortuusassallutik.

”Naalakkersuisuniit meeqqat inuusuttuaqqallu isumaat tusassallugit pingaartipparput. Siunissarivagut, siunissavullu pataajaassuseqarlutillu sapiissuseqassapput, taamaattumik NAKUUSAp suliniutaa ”Uagut ulluinnarput, uagut niperput” Naalakkersuisuniit tapersersorparput”,

 Naalakkersuisoq Martha Lund Olsen oqaaseqarpoq nangillunilu,
Meeqqat pisinnaatitaaffitik ilisimassagaat pingaaruteqarpoq, ilaatigullu NAKUUSAp suliniutaa aqqutigalugu tamanna piviusunngortinneqarsinnaavoq.”

Ukiut tallimat kingulliit NAKUUSA Meeqqat Isummersorfiat sinerissamit tamanit inuusuttuaqqanit 15-init ilaasortaaffigineqartoq ingerlappaa. Taakku siunnersuuteqartartuupput ukiumullu ataasiarlutik ataatsimeersuaartinneqartarlutik. Meeqqat Isummersorfeqarnerup takutippaa inuusuttut pisinnaatitaaffitik pillugit ilisimasaat annertuseriarujussuarnikuusut, minnerunngitsumillu nukissaqarnerullutillu inuiaqatigiinnut pissutsinut eqeersimaarnerujussuanngorlutik.

Nunat naalagaaffeqatigiit Meeqqat Pillugit Isumaqatigiissutaanni Meeqqat Pisinnaatitaaffii pillugit nunatsinni paasititsiniaanermi una suliniut nutaarluinnaavoq, tassani Kommunit suleqatigineqassapput saniatigullu atuarfiit tamarmik suleqatigineqassapput.

Qeqqata Kommuniata borgmesteria Hermann Berthelsenip siullersaalluni isumaqatigiissut ullumikkut atsiorpaa. NAKUUSAp suliniut ukioq kingullerli Qeqqata Kommunianut saqqummiutereernikuuaa, massakkullu piffissanngorpoq isumaqatigiissutip atsiornissaanut.

Qeqqata Kommuniata borgmesteria Hermann Berthelsen Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsenilu isumalluartorujussuupput Qeqqatalu Kommuniani meeqqat inussuttullu pilluaqquaat.

 

NAKUUSA pillugu
NAKUUSA tassaavoq Naalakkersuisut UNICEF Danmarkillu suleqatiginnerisigut pilersinneqartoq ukiuni tallimani atuuttussaq. Suliniutip siunertaasa ilagivaat meeqqat inuusuttullu pisinnaatitaaffiisa Nunatsinni ilisimaneqarnerulernissaat.

 

Suli paasisaqarusukkaanni attavissaapput:

Projektleder Najaaraq Møller, tlf. +299 539203, moln@nanoq.gl
Programleder Arnavaraq Jørgensen, tlf. +45 30 28 18 95,
ajoergensen@unicef.dk