Seoul-imi Kalaallit Nunaata inuussutissarsiornermi annertuumik nittarsaassinera

Vittus Qujaukitsoq ulloq 16. marts 2016 Seoul-imi Kalaallit Nunaata inuussutissarsiornermi nittarsaassinerani annertunerusumi qaaqqusisuuvoq. Isumasioqatigiinnerni marlunni ilaatigut Kalaallit Nunaanni seafood, puisip amii aamma takornariartitsisarneq, ilaatigullu Kalaallit Nunaanni attaveqarnermut, erngup nukinganut aamma aatsitassanut tunngatillugu aningaasaliinissamut periarfissaqarfiusut, sammineqassapput.

Inuussutissarsiornermi nittarsaassineq Koreami kujallermi ministerit, suliffeqarfissuit qullersaqarfiinik aammalu suleqatissaalersinnaasunik ataatsimeeqateqarnernik aallarnerneqassaaq.

Isumasioqatigiinneq Royal Greenland aamma Polar Seafood, Kalaallit Nunaanni seafood-inik avammut tuniniaasartut annersarisaat, suleqatigalugit aaqqissuunneqarpoq, tamatumalu saniatigut Visit Greenland, Great Greenland, Air Greenland aamma Albatros China, True North Gems, Ironbark, GME aamma Hudson Ressources peqataassapput.  Maannangaaq isumasioqatigiinnernut tamaginnut peqataaniarlutik nalunaartut 100-it sinneqalereerput – Inuussutissarsiornermut, Suliffeqarnermut, Niuernermut Nunanullu Allanut Naalakkersuisup tikilluaqqusineratigut ammaaneq pissaaq.

Isumasioqatigiinnermi aamma puisit amiinik pilerisaarineq sammineqassaaq. Great Greenland-ip kavaajaliai nutaanerpaat takutitsisartunit najukkameersunit mutinik takutitsinermi takutinneqassapput.

Isumasioqatigiinnerit marluk tamarmik, Edda Lyberth pisup ingerlanerani kalaallit nerisarisartagai pillugit oqaluttuartoq isumassarsiorfigalugu, Royal Greenland-ip tunisassiaannik koreamiut igasut igasimasaannik kusanartumik ussigassiilluni aaqqissuussinermik, naggaserneqassapput.

Vittus Qujaukitsoq oqarpoq: ”2012-imi Kalaallit Nunaanniit kingullermik tikeraarnerup malitseqartinneqarnissaa kissaatigalugu Koreap kujalliup tungaaniit sivisuumik oqaatigineqartarsimavoq. Ilaatigut Korea kujallermiut takornariat Nunanut avannarlernut tikeraartartut annertuumik amerlisimapput, ilaatigullu Seoul-imi suliffissuaqarnermi suliffissuarnut qullersaqarfiusut angisoorujussuit arlaqartut aatsitassarpassuarnik Kalaallit Nunaanneersunik pisisartunngorsinnaanerat periarfissaqarfiulluni.

2016-imi novembarimi Kina-mi inuussutissarsiornermi nittarsaassinissaq pilersaarutigineqarpoq. Tassani ilaatigut Qingdao-imi aalisarnermi nuisitsinermut annertuumut atatillugu Kalaallit Nunaata takutitsinissaa aaqqissuunneqassaaq, ilaatigullu takornariartitsisarneq, mutit aamma kulturi sammillugit Beijing-imi takutitsisoqassalluni. Suliffeqarfiit soqutiginnittut peqataanissaminnik soqutiginnikkunik maannangaaq Inuussutissarsiornermut, Suliffeqarnermut Niuernermullu Naalakkersuisoqarfimmut saaffiginnissinnaalereerput. Ullut aalajangiunneqartut aammalu pisussanut pilersaarummut missingiut 2016-imi juunip naanerani piareersimassapput.

 

Paasissutissanik annertunerusunik piniarnermi attaveqarfissaq:

Naalakkersuisup allattaa Nauja Møller oqarasuaammut angallattakkamut +299 54 41 42