Naalakkersuisut kommuninut nakkutilliisuupput

Aviisimi AG-mi 9. marts-imeersumi allakkiaq imatut qulequtalik atuarneqarsinnaavoq: "Nakkutilliisoqarfik qulaajaavigitikkusukkaa". Allakkiami oqaatigineqarpoq, Kommuninut nakkutilliisoqarfimmit annertusisamik ilaatigut Qaasuitsup Kommunia nakkutigisaasoq. Tamannali ilumuunngilaq.

Taamaattumik Nalaakkersuisut Siulittaasuata Naalakkersuisoqarfiata nunamut namminermut pissutsinut akisussaasutut tulliuttut nalunaarutigissavai.

Nakkutilliisoqarfiup qulakkiissavaa kommunit inatsisit malillugit ingerlatsinissaat.

Naalakkersuisut kommuninut nakkutilliisuupput. Nalinginnaasumik Naalakkersuisoqarfiit, tamarmik namminneq oqartussaaffigisaminni nakkutilliinermik isumaginnittartuupput. Taamaasilluni Aningaasaqarnermut Naalakkersuisoqarfiup kommunit aningaasanik aqutsinerannik nakkutilliisuuvoq. Ukiuni kingullerni Aningaasaqarnermut Naalakkersuisoqarfiup allatut ajornartumik Kommuneqarfik Sermersuumik, Qaasuitsup Kommunianik aamma Kommune Kujallermik annertusisamik nakkutilliinermik ingerlatsisariaqarsimavoq, tamatumalu ilaatigut kingunerisimavaa kommuninut iliuusissatut pilersaarutit ingerlanneqarnissaat pillugit isumaqatigiissusiortoqarsimaneranik. Ullumikkut taamaallaat Qaasuitsup Kommunia, annertusisamik nakkutigisaavoq.

Taamatuttaaq Naalakkersuisut kommuni ataaseq Nakkutilliisoqarfimmut suliassanngortissinnaavaat. Tamatuma kingornatigut ilaatigut Nakkutilliisoqarfimmit kommunalbestyrelsip aalajangiisimanera atorunnaarsinneqarsinnaavoq, tamanna inatsisiliornermut akerliuppat imaluunniit kommunalbestyrelsimi ilaasortat akiliisussanngortissinnaapput, inatsisitigut pisussaaffigalugit iliuusissatut pilersaarusiunngitsoorsimappata. Nakkutilliisoqarfiup aalajangiinera taamaattoq kingullerpaaq 2012-imeersuuvoq.

Taamaattumik erseqqissaatigineqassaaq, Nakkutilliisoqarfiunngitsumit kisiannili Aningaasaqarnermut Naalakkersuisoqarfik Naalakkersuisut sinnerlugit kommuninut oqaatigineqartunut annertusisamik nakkutilliinermik atortuulersitsisimammat.

Naalakkersuisut kiisalu Nakkutilliisoqarfiup nakkutilliinera tamatumanilu iliuusereriikkanut kinguneqartitsisinnaanermut periarfissat Kommunit aqunneqarnerat pillugu Inatsisartut inatsisaat nr. 22, 18. november 2010-meersumi kap. 7 aamma kap 9-imi malittarisassaqartinneqarput.

Attavissaq: Nunami Namminermi Pissutsinut Immikkoortortaqarfimmi pisortaq Martha Abelsen tlf. 34 51 11 maab@nanoq.gl