Nunani tamalaani arnat ulluat ulloq 8. marts

Marlunngorneq ulloq 8. marts nunani tamalaani arnat ulluat, ukiut tamaasa pisartoq, inuiaqatigiinni arnat naligiissitaanerannik aallussiviusartoq, nalliussissavarput.

”Arnarpassuit ulluinnarni ingerlalluartumik inuuneqarput. Ilinniarsimasut aamma suliffeqarlutik atorfimminni qaffakkiartortartut amerliartorput, peqatigisaanillu ilaqutariinni ulluinnarni inuuneq inissaqartinneqarluni” oqarpoq Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen, marlunngorneq ulloq 8. marts nunani tamalaani arnat ulluata malunnartinneqarnissaanut atatillugu, nangillunilu,

”Kisianni arnat amerlavallaat persuttagaallutik atugaqartinneqarput. Tamanna ajornartorsiutaavoq Naalakkersuisut ilungersunartutut isigisaat. Arlalinnik siunnerfilinnik suliniuteqarpugut, ilaatigut persuttaasarneq akiorniarlugu iliuusissanut periusissanullu pilersaaruterput aqqutigalugu. Persuttaasartut samminerulissavagut. Angutit oqaloqatigiittartoqatigiit annertoorujussuarmik suliaqartooreerput, kisianni immikkut suliniuteqarnissaq pisariaqartinneqarpoq.”

Neqeroorutinik arlalinnik persuttaanermit eqqugaasunik aallussiviusunik peqareerpoq. 2015-imi Qeqertarsuarni Illernit, nuna tamakkerlugu qimarnguik katsorsaaviutigisoq ammarneqarpoq. Illernit ukioq ataaseq tikillugu sivisussusilimmik arnanut persuttagaasimasunut meeraannullu ilinniarsimasut sulisoralugit katsorsaanissamik tapersersuinissamillu neqerooruteqarpoq. Ilaqutariinnermut, Naligiissitaanermut Isumaginninnermullu Naalakkersuisoqarfik Kalaallit Nunaat tamakkerlugu qimarnguinnut ilaqutariinnullu sullissivinnut aamma tapersiisarpoq.

”8. marts Kalaallit Nunaanni ullutsinni arnat atugaasa sammineqarnissaannut periarfissaalluarpoq,” naggasiivoq Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen.

Paasissutissanik annertunerusunik piniarnermi attaveqarfigineqassaaq Niels Thomas Andersen oqarasuaat 34 53 39 imaluunniit Hanne Nielsen oqarasuaat 34 66 04