Karl-Kristian Kruse, WWF-ip isumaanut akerliulluinnarpoq

Stemningsbillede

Qaanaami inuussutissarsiutit pillugit januaarimi isumasioqatigiittoqareersorlu Qaanaami aalisartut atugaat pitsaanerulersissallugit kissaatinik assigiinngitsunik allattuinngilanga, naak Atuagagdliutit pingasunngormat saqqummersoq aqqutigalugu taama oqaasertaliisoqaraluartoq. Akerlianilli taavani aalisarnermik inuussutissarsiuteqaleriartornerup periarfissaanik sunillu pisariaqartitsisinnaaneranik tikkuartuivunga.

Aamma WWF-ip isumaanut isumaqataanngilluinnarpunga, oqarmat aalisarneq pimoorunneqarlualerpat qalerallit nungullugit aalisarneqassasut.

Taama Aalisarnermut, Piniarnermut Nunalerinermullu Naalakkersuisoq, Karl-Kristian Kruse, AG-mut, uge 09-mut saqqummersumi allaaserisamut oqarpoq. AG-mi allaaserisaq qulequtarineqarluni: Qaanaami qaleraleqassuseq mianersuussiuk.

Qaanaami, taassumalu eqqaani najugallit aalisartunngornissaannut periarfissiilaarta. Aalisartummi suli amerlanerusunik aalisarusullutik soqutiginnittorujussuupput. Royal Greenlandip tunisassiorfianut qalerallit ukioq kingulleq tunineqartut 138 tonsiupput. Qeqertarsuup Tunuani aalisarneqartartunut sanilliullugit amerlagisassaanatik. Aalisarneqarsimasut takutippaat aalisapiluttoqalersoq? Taamaaqqajanngilluinnarpoq.
WWF oqarpoq sattaaserluni aalisartoqartoq, tamaanilu qalerallit qanoq amerlatigisut aalisarsinnaanerinut ilisimannittoqanngitsoq. Suliniaqatigiiffiullu aarleqqutigivaa Qeqertat eqqaanni qaleralinniarnerup aallunneqarnerujussua, tamaani aalisarneq annertuallaalersinnaanerarlugu.

Qaleralittarineqartut ukiuni kingullerni tunineqartartut pingasoriaatinngormata, siunissamilu aamma suli aalisarneruneqalerpata, taava qalerallit aalisarlugit nungunneqarsimassappat?

Taama isumaqanngilanga, tamassuma imartaa suli misissorneqarsimanngimmat.

Qaanaami inuussutissarsiutit pillugit isumasioqatigiittoqarmat oqalugiarninni erseqqissaassutigaara piffissanngortoq avaqqunneqarsinnaananilu Qaanaap kujammut avannamullu imartarujussuata pisuussutai misissorneqassasut, aalisarnermik ilaatigut misileraasoqartassalluni. Tamanna Naalakkersuisoqarfimmit pilersaarusiortariaqarluni tamatumunnga susassaqartut peqatigalugit, aamma Pinngortitaleriffik tamatumani ilaatinneqassalluni.

Oqalugiarninni aamma erseqqissaassutigaara Qaanaap eqqaata imartaa aamma Qeqertat kangerluata imartaa uuttortaavigineqassasoq, tamaani aalisarneq siuarsarneqassalluni.

Suliniutissatut tikkuakkama takutinngilaat sattalluni aalisartoqassasoq, soorlu WWF taama oqarniartoq, oqarlunilu arlaannaannilluunniit ilisimaneqanngitsoq qanoq amerlatigisunik aalisartoqarsinnaanersoq.
DTU nalunaarusiamini “Qaanaaq, tamatumalu eqqaa – sanaartorfigineqarnera inuussutissarsiutillu tunngavigineqartut” ilaatigut allappoq Asiaq suleqatigalugu immap assinganik pisortatigoortuunngitsumik atorneqarsinnaasumik suliaqarlutik, taanna aalisakkat sumiinnerinik nalunaaqutsersorfigineqassalluni.

Naalakkersuisooqatigiit isumaqatigiissutigaat aalisakkanik allanik ullumikkut aalisarneqanngitsunik aalisarneqarsinnaasunik aamma misissuisoqassasoq, aalisarfigineqarsimanngitsuni aalisalersinnaanissaq aamma misissorneqassasoq. Misileraalluni aalisarneq siuarsaavigineqassasoq, aalisakkat nunatsinni aamma tunisassiarineqartarnissaat qulakkeerneqassasoq.

Isumaqarpunga Atuagagdliutini qulaani innersuussutigisara allaaserisaq illuinnaasiorpallaartoq, Aalisarnermut, Piniarnermut Nunalerinermullu Naalakkersuisutut aperineqarsimasinnaagaluarpunga, aalisarnermut tunngasunik kattuffiit imaluunniit Qaanaami piniartut aalisartullu peqatigiiffianni ilaasortat ilaat AG-mut allaaserisamut tunngatillugu aamma aperineqarsimasinnaagaluarlutik.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaq, Jørgen Isak Olsen. Mail jio@nanoq.gl