Umiaqatigiippugut

Kommuunini sisamaasuniit, Namminersorlutik Oqartussani Namminersorlutillu oqartussat suliffeqarfiutaanit aaqqissuutaanillu sulisut 60-t pilersaarusiorneq pillugu naapeqatigiinnerminnik pingaarnertut naliliinerannit oqaaseqaat taamaappoq.

Aningaasaqarnermut, Aaatsitassanullu Naalakkersuisoq Randi Vestergaard Evaldsenip naapeqatigiinnermik ammaanermini erseqqissaatigivaa imaattoq ”lnunami innuttaasut piumasarivaat, Kalaallit Nunaata ajornartorsiutaanik qaangiiniarnermi ataatsimoorluta aaqqiissutissanik nassaarniassasugut”.

Tamannalu peqataasunit isiginniarneqarluni. Nunattami iluani unamminartut ataatsimoorullugit iliuuseqarfiginissaat pingaarnertaavoq, sumiiffinni iluarsiissutaasinnaasut pillugit avissaartuutinnginnissamiit.

Naapeqatigiinnermilu peqataasunit tikkuarneqarluni, inuutissarsiutitigut ineriartortitsinissap qulakkeernissaat, nunatsinniillu nuttarnerit unitsinniarnissaat, nunatta tamarmiusumik atuiffiulluarfisumillu ineriartortsinnissaanut toqqammavissatut iluaqutaassapput. Peqataasullu tikkuarpaat, tamatumani aamma kikkut tamat meeqqat aturafiannit qimaguttut naligiimmik periarfisssaqartitaanissaat pingaaruteqartuummat. Ullumikkummi nunatsinni sumiikkaluaraanniluunniit taamaattoqanngimmat.

Sanaartornermi aningaasaliissuteqartarnerup marloqiusatut aaqqitaanissaa, kommuninit Namminersorlutik Oqartussanit inuutissarsiutaatilinnillu neriuuteqarfigineqarpoq, sanaartornikkummi tamanna pilersaarusiornermut sanaartornermullu iluaqutaassammat. Tamatuma saniatigut Namminersornerusut naalakkersuisoqarfiisa sumiiffinni pilersaarusiornermikkut ukiuni tulliuttuni tulleriiaarinissatigut kommuunit peqataatinnerunissaat pingaaruteqartuummat isumaqataaffigilluarneqarluni.

Naapeqatigiinnermi oqallinnertigut paasinarsivoq, pisortat iluanni aaqqissuusseqqinnerup siunertaatut piaartumik piviusunngortitsinissamik Politikkikkut Ataqatigiissarisut isumaa isumaqataaffigineqarluartoq. Tamatumalu kinguneranik Namminersorlutik Oqartussat susassaqarfiisa kommuuninut nussorneqartariaqarlutik.

Naak soqutigisat kommuunit akornanni, taamatullu kommunit Namminersorlutillu Oqartussat akornanni assigiinngikkaluartut, nunatsinni unamminartut pingaartinnerunissaat naapeqatigiinnermi ataatsimoorfiuvoq.

- Naapeqatigiinnermi illuatungeriit akaareqatigiinnissaata pingaaruteqarnerunera erseqqissarneqarmat iluarisimaarnarpoq, tamatsinnummi unamminartut attuumassuteqartut anigorniarnissaanni peqataarusuppugut. Peqataasut ilaat taamatut anersaaruluuteqarpoq.

 

 

Annertunerusumik paasissutissat pillugit attavigiuk:

KANUKOKA-p pisortaa Hans-Peder Barlach Christensen, hpbc@kanukoka.gl, 36 21 00.

Kommuneqarfik Sermersuumi pisortaq Mike Jakob Kristiansen, mjkr@sermersooq.gl, 36 74 01.

Aningaasaqarnermut Naalakkersuisoqarfimmi immikkoortortami pisortaq Thomas Gaarde Madsen, thga@nanoq.gl, 34 54 15.