Isumaginninnermi inatsisissatut siunnersuut kinguartinneqarpoq

Isumaginninnerup aqunneqarneranut aaqqissuussaaneranullu inatsisissatut siunnersuut kinguartinneqarpoq

Naalakkersuisut isumaginninnerup aqunneqarneranut aaqqissuussaaneranullu siunnersuutigisaat piffissami sivitsulersumi oqallisigineqarlunilu naammagittaalliutigineqarnera toqqammavigalugu, Isumaginninnermut Naalakkersuisup Martha Lund Olsen-ip qinersimavaa Inatsisartut oqaluuserisassaanit peerallarniarlugu.

”Pingaaruteqartutut isigaara arlaatigut naammagittaalliortoqarsimatillugu tusaaniarnis-sarput, qinersimavaralu siunnersuutip piviusunngortinniannginnerani inatsisilerituunnit kikkunnulluunniit attuumassuteqanngitsunut misissortilluaqqissaassallugu”, taamak oqarpoq Martha Lund Olsen.

2015-ip ingerlanerani isumaginninnikkut nakkutilliisitat kommunit ingerlatsiveqarfiinik misissuiartortarsimanerminni ingammik meeqqat inuusuttuaqqallu sumiginnakkat pillugit annertuumik qarsupittumik suliariniarneqartarsimasunik toraagaqartarsimapput. Naalakkersuisut inatsisissatut siunnersuut aqqutigalugu periarfissinneqarusussimapput, paasisani pissusissamisuunngilluinnartunik toraagaqartarsimanertik toqqammavigalugu akulerussinnaasalernissamut.

”Inatsisartut Ilaqutariinnermut Peqqissutsimullu ataatsimiititaliamut 5. maj 2015-mi allakkatigut paasissutissiissimanerma kingunerisaanik aperineqarsimavunga, ilumut kommuninut akisussaaffinnik akisussaaffinnik pingaaruteqartunik tunniussuisarsimanigut tuaviuuppallaartarsimanerigut. Uanga nammineq taamatut isumaqanngilanga. Taamaattorli isumaqarlunga pissusissamisoortoq kommunini nakkutilliiartortarnitsinni paasigaanngatsigu pisariaqartoq kommunit isumaginninnikkut sumiginnaasimanerat toqqammavigalugu immikkut iliuuseqaateqartoqarnissaanik iliuuseqapallassinnaasarnissamut periarfissinneqartariaqartugut”, taamak oqarpoq Martha Lund Olsen.

Inatsisit maannakkutut isikkoqartillugit, Naalakkersuisut periarfissaqanngillat toqqaannartumik iliuuseqassallutik, assersuutigalugumi kommunit meeqqat atornerlunneqarsimatillugit iliuuseqarsimanngikkaangata avaqqullugit akuleruttarnissamut pisinnaatitaaffeqanngilagut. Tamannali inatsisissatut siunnersuusiornitsinni allatut aaqqiiviginiarsimagaluarparput.

”Nalornissutiginagu oqaatigisinnaavara taamatut inuiaqatigiinnit sumiginnaasoqarsimaneranik kommuninit iliuuseqartoqartarsimannginnerisa kingunerisaannik utersaariaassutigineqartartut sumorsuaq sunniuteqarnerluttarmata, aammalu meeqqat pineqartut imatut kinguneqarsinnaasarlutik taakkua innuttaasutut pisinnaatitaaffimminnik arsaarneqartartut aammalu kingorna ilinniagaqalernissamut toqqissisimanartumillu inooqataanissamut periarfissarisaat innarliivigineqartartut. Pissutsit tamakku inuiaqatigiittut akuersaarsinnaanngilluinnarpagut”, naggasiivoq Martha Lund Olsen.

Ilaqutariinnermut, Naligiissitaanermut Isumaginninnermullu Naalakkersuisoqarfiup piaartumik inatsisilerituut sumulluunniit attuumassuteqanngitsut siunnersuutaasimasoq pillugu nalilersuitinniarpai. Siunertaavoq isumaginninnikkut ingerlatsineq aaqqissuussaanerlu pillugit inatsimmut allannguutissatut siunnersuutit tamatuma kinguninnguatigut Inatsisartunut oqaluuserisassanngortinneqarsinnaajumaartut.

 

Annertunerusumik paasisaqarusukkussi attaveqarfissaq: Naalakkersuisup allattaa Hanne Nielsen,
Oqar. +299 53 93 71, E-mail: hani@nanoq.gl