Nunalerineq pillugu Siunnersuisoqatigiit 37-ssaanik ataatsimiittut

Nunalerineq pillugu Siunnersuisoqatigiit 37-ssaanik Qaqortumi 1. marts 2016 ataatsimiipput

Siunnersuisoqatigiit kingullermik ataatsimiinnerminni pingaarutilinnik eqqartukkaminni makku iluatsillugu avammut oqaaseqaatigerusuppaat:

Nunalerineq pillugu Siunnersuisoqatigiit Naalakkersuisut Inatsisartullu qutsavigiumavaat nerukkaatissanik ivikkanillu immikkut 2015-imi ukiakkut 3,2 mio. kr.-nik nalilinnik pisiniartariaqarnermi tapersiisimammata. Immikkut nerukkaatissanik pisinniartariaqarneq pissuteqarpoq panernersuup malittigisaanik nerukkaatissat inerisitat savaatillit ilaannit annikinnerusimammata.

Aammattaaq Nunalerineq pillugu Siunnersuisoqatigiit Naalakkersuisut Inatsisartullu qujassuteqarput 2015-imi 2016-imilu Aningaasanut Inatsisikkut nunalerinerup ineriartortinnissaanut aningaasaliissuteqarmata, ukuusunut:

1. Nersutaasivinnik nutarterineq aserfallatsaaliuinerlu, tassunga ilanngullugit nersutaasiviit naqqi.

2. Savanik piaqqiortussanik pissarsinissaq

3. Narsaatini aqquserngit tallineqarnissaat, narsaatinillu allisaanissaq

4. Illut naatitsiviit amerlineqarnissaat allineqarnissaalluunniit

5. Nukissiuutinik qorsunnik atuinerulernissaq

6. Imerterutinik amerlanerusunik pissarsinissaq.

Nunalerineq pillugu Siunnersuisoqatigiilli isumaqarput 6 mio. kr.-t aningaasanut inatsimmi konto-mut eqartorujussuarmut inissinneqarsimasut taamaasilluni savaatillit namminneq qulaani taaneqartunut akiliisinnaanerat ajornakusoortilerlugu.

Savaatillit 2015-imi angusaasa appasinnerat ukiunut siuliinut sanilliullugu ajoraluartumik 2011-miilli tassunga ingerlasoq takuneqarsinnaavoq, savaaqqat 2011-mi tunineqartut 21.363-mallutik 2015-imi 18.493-simapput, ikileriaat 2.770. Tunisaasartut amerlassusaasa apparsimanerisa saniatigut savaaraq ataaseq aveqatigiissillugu 2011-mi 15,20 kg-simasoq 2015-imi 13,33 kg-simavoq, tassa appariaat 3 kg ataatilaarlugu.

Immikkut aningaasaliissutaasimasut aningaasaliissutaareersullu inissisimanerup pitsap tungaanut sangutissappassuk pisariaqarpoq inatsisinik allannguinissaq aammalu aningaasaliinermi piumasaqaatinik eqaallisaanissaq. Taamaaliornikkut aatsaat annertusaanermik pilersitsissinnaammata.

Nunalerineq pillugu Siunnersuisoqatigiit sinnerlugit

 

Niels Lund
Siulittaasoq
Tlf. 199211