True North Gems Greenland peqatigalugu IBA-mik naliliineq

True North Gems Greenland-ip rubinisiorfianut IBA True North Gems Greenland-imit (TNGG), Kommuneqarfik Sermersuumit aamma Naalakkersuisunit Qeqertarsuatsiaani ulloq 16. juni 2014 atsiorneqarpoq. Ukioq ataaseq sinnerlugu ingerlareerpoq aammalu IBA-mi suleqataasut pingasut taakkua naliliinermut alapernaarsuinermullu nalunaarusiaq siulleq tamanut saqqummiussinnaagamikku nuannaarutigisorujussuuaat. Nalunaarusiami takutinneqarpoq, rubinisiorfik Kalaallit Nunaanni aatsitassarsiornermik suliaqarnerup aammalu inuiaqatigiit kalaallit ineriartortitsinnerannut iluaqutaasoq.

Kommuneqarfik Sermersuumi borgmesteri Asii Chemnitz Narup, oqarpoq: “Suliassami innuttaaqatikka taama amerlatigisut atorfinitsinneqarsimammata aammalu suliffeqarfiit Kommuneqarfik Sermersuumeersut taama amerlatigisut atorneqarmata tulluusimaarutigisorujussuuara. Tamanna imatut paasivara True North Gems Greenland-ip sanaartornerup immikkoortuani najukkami annertoorujussuarmik suliniarsimaneranut tamanna takussutissaavoq. Ukiuni aggersuni suleqatigiinnerup ajunngilluinnartup ingerlaqqinnissaanut kommuni qilanaarpoq.” 

“True North Gems Greenland ukioq siulleq nunaqavissuinnavinnik sulisoqarsinnaasimammat, aammalu suliffeqarfiit kalaallinit pigineqartut amerlasuut atorsimammatigit, tamanna nuannaarutigisorujussuuara. Neriuutigaara TNGG-ip maannamut angusai pitsaasut, aatsitassarsiorfiutileqatigiiffiit allat nunaqavissunik suliffissaqartitsinissap qulakkeernissaanut immikkut suliniuteqarnissamut isumassarsiorfigisinnaassagaat. Tamanna TNGG-ip immikkut suliniarneratigut pisussaaffeqarneratigullu aatsaat anguneqarpoq”, Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq oqarpoq, ilanngullugulu oqaatigalugu ”True North Gems Greenland-ip aamma Kommuneqarfik Sermersuup suleqatigineqarnerisa ingerlaqqinnissaannut Naalakkersuisut qilanaarput, neriuutigaaralu suliassaq ingerlanneqarnini tamaat taamaaqataanik najukkami suliniarnermik takutitsiviusinnaassasoq”

Bent Olsvig Jensen, True North Gems Greenland-imi pisortaaneq ukiumi siullermi misigisani imatut oqaatigai: “Najukkami suliniarnitsinni suliassaq kalaallit aatsitassarsiorfiattut inississinnaasimagatsigu, taamaalillutalu kalaallit innuttaaqativut suleqatigalugit aatsitassarsiorfiup ineriartortinnissaanik takorluugaqarnerput piviusunngortikkatsigu, tulluusimaarutigisorujussuuara” 

Atuarluarisi!

True North Gems Greenland               Kommuneqarfik Sermersooq                       Naalakkersuisut

Alapernaarsuinermut Naliliinermullu nalunaarusiaq

IBA ilanngussat nutarterneqartut ilanngullugit 2016-imut (tuluttut) atuuttoq kalaallisuunngortillugu nutsertinneqaleruttorpoq. Taanna ilanngussat nutserneqarnerat tiguneqarniariarpat tamanut saqqummersinneqassaaq.

 

Annertunerusumik paasisaqarusunnermi attaveqarfissat:

Kommuneqarfik Sermersooq: Pisortaq Grethe Nielsen,  Tel + 299 368 160 & e-mail grni@sermersooq.gl

Naalakkersuisut (Inuussutissarsiornermut, Suliffeqarnermut Niuernermullu Naalakkersuisoqarfik): Naalakkersuisoqarfimmi pisortaaneq Jørn Skov Nielsen, Mobil +299 556 188

True North Gems Greenland: Pisortaaneq Bent Olsvig Jensen, Mobil  +299 499 599

 

Assiliisoq: Bjarke De Renouard