EU-imi

EU-OLT-imi Oqalliffik aamma EU-imi kommissærip aamma EU-imi siulittaasoqarfiup ataatsimeeqatigineqarneri

Naalakkersuisuni ilaasortaq Inuussutissarsiornermut, Suliffeqarnermut, Niuernermut Nunanullu Allanut akisussaasuusoq Vittus Qujaukitsoq ulloq 26. februar OLT-imi (Oversøiske Lande og Territories) aamma EU-imi oqallinnerni peqataavoq. Tassunga atatillugu Vittus Qujaukitsup EU-imi Ineriartortitsinermut aamma Nunani tamalaani suleqatigiinnermut Kommissæri Neven Mimica kiisalu EU-imi siulittaasoqarfik ataatsimeeqatigai.

OLT-EU-imut siunertaavoq ilaatigut illuatungeriit akornanni ingerlaavartumik oqaloqatigiittarnissamut naapiffissaqalersitsinissaq, ilaatigullu OLT-it EU-imik suleqateqarnerup iluani pisinnaatitaaffiisa periarfissaasalu nukittorsarneqarnissaat.

OLT-EU-imi Oqalliffiup ataani qulequttat ilaatigut tassaapput nunani OLT-imut ilaasortaasuni siuariartortitsineq aamma aningaasaliinissamut periarfissat, OLT-it 2015-2020-imut periusissanut pilersaarutaat kiisalu silap pissusaani allannguutit aamma suliassaqarfimmi OLT-it suliniuteqarnerat. Oqallinnernut ilanngussaqarnermini Vittus Qujaukitsup Kalaallit Nunaata aningaasaqarnikkut ineriartortitsinissamut pisariaqartitsinera aammalu suliassaqarfinni assigiinngitsuni, soorlu; aatsitassanut suliassaqarfik, takornariartitsisarneq aamma inuussutissarsiorneq, ineriartortitsinissaq sulissutiginiarneqartoq, pingaartumik erseqqissarpaa.

Vittus Qujaukitsoq erseqqissarpaa: ”OLT-imi suleqatigiinneq pingaaruteqarpoq, tassami tassani EU-mi suliniutit naleqquttut, EU-mi niuerfinnut akitsuusigaanngitsumik eqqussinissamut Kalaallit Nunaat periarfissaqalersittarpaa kiisalu Europami Aningaasalersuinermut aningaaserivik aqqutigalugu taarsigassarsinissamut aningaasalersuinissamullu periarfissanut aamma Europa-Kommissionip periusissatigut aningaasalersuinissamut pilersaarutaanit, EFSI-mit aningaasassanik, periarfissaqalersittarlugu.”

Ineriartortitsinermut Nunanilu tamalaani suleqatigiinnermut EU-imi Kommissæri Neven Mimica, ilaatigut OLT-ip Kalaallit Nunaannik suleqateqarneranut aamma suleqatigiinnissamut isumaqatigiissummut akisussaasuuvoq. Ataatsimiinnermi Kalaallit Nunaata suleqatigineqarnerata piviusunngortinneqarsimanera annertoorujussuarmik naammagisimaarlugu Kommissærip oqaatigaa.

Tikeraarnermut Holland-imi EU-mi siulittaasoqarfiup kiisalu Aruba-mi OLT-nut kattuffimmut siulittaasoqarfiup, persuarsiorfiunngitsumik ataatsimeeqatiginissaat taamatuttaaq ilaatinneqarput. Ataatsimiinnermi OLT EU-llu suleqatigiinnerat ukiuni aggersuni pingaarnersiuinermi salliutinneqartut oqallisigineqarput, tassani illuatungeriit akornanni siuariartortitsinissamut periarfissat aammalu siunissami suleqatigiinnissaq aallunneqassallutik.

Tamatuma saniatigut Kalaallit Nunaat pingasunngornermi suleqatigiit pingasut, Kalaallit Nunaata, Danmarkip aamma Europa-Kommissionip, ataatsimeeqatigiinneranni, ataatsimeeqataavoq. Ataatsimiinnermi EU-p Kalaallit Nunaata suleqatigiinneranni pingaarnertut ilaatinneqartut oqallisigineqarput, ilanngullugit ilinniartitaanermi suleqatigiinnermut isumaqatigiissutip piviusunngortinneqarnissaa, Europamiut Kalaallit Nunaanni aningaasaliinissamut periarfissai kiisalu kalaallit raajaasa Europami niuerfinnut akitsuuteqanngitsumik eqqunneqartarnissaat.

Pasissutissanik annertunerusunik piniarnermi attaveqarfissaq: Sinniisoqarfimmi pisortaq Lida Lennert, +32 499 99 98 58

Vittus og Neven Mimica

Ineriartortitsinermut aamma Nunani tamalaani suleqatigiinnermut Kommissæri Neven Mimica, Vittus Qujaukitsoq