Qaasuitsoq pillugu paatsiveerusimaartoqanngilaq

Nutaarsiassaqartitsivik Sermitsiaq.AG ullumi allappoq imak qulequtalimmik ”Qaasuitsup siunissaa pillugu paatsiveerusimaarnerujussuaq”, allallutik ”Naalakkersuisut Siulittaasuata Kim Kielsenip (S) kommunit amerlineqarnissaannik kissaateqarnani nalunaarutigereeraluarlugu Qaasuitsup Kommuniata avinneqarsinnaanissaanut periarfissaq ammatiinnarusuppaa”.

Sermitsiaq.AG-p Qaasuitsup Kommuniata avinneqassaneranik apeqqut pillugu isummannik allanngortitsisimanerarlugu ilimasaarivoq. Uannit, KANUKOKA-p siulittaasuanit borgmesterinillu sisamaasunit ataasinngornermi 22. februaari 2016 tusagassiorfinnut nalunaarummi ” Aaqqissuussaanermut Isumalioqatigiissitap isumaliutissiissutaani periutsit aalajangiusimaneqarput”-mik qulequtaqartumi titarnertaat tallimaani oqaaseqatigiit kingullianni allassimavoq ”Aalajangiisoqannginnerani kingunerisinnaasat tamarmik qulaajarneqassasut isumaqatigiissutigineqarpoq.”

Tusagassiorfinnut nalunaarut taanna aallaavigalugu tusagassiorfiit Qaasuitsup Kommuniata avinneqassannginnerarlugu inerniliillutik tusagassiinertik namminneq akisussaaffigissavaat. Naalakkersuisut Siulittaasuata Naalakkersuisoqarfiannit tusagassiorfiit kukkusumik nassuiaasimanerat pillugu naqqiinermi ullumi nassiunneqartumi Sermitsiaq.AG aamma ilanngunneqarsimasussaagaluarpoq.

KANUKOKA-p siulittaasua Palle Jerimiassen ullumi 24. februaari 2016 aamma tusagassiorfinnut erseqqissaatigaa 22. februaari 2016 tusagassiorfinnut nalunaarummi Qaasuitsup Kommuniata avinneqarnissaanik kissaatip itigartinneqarsimaneranik sumiluunniit allassimasoqanngitsoq.

 

Kim Kielsen
Naalakkersuisut Siulittaasuat

 

 

Paasisaqarnerorusuttut attavigisinnaavaat Naalakkersuisumut allatsi Karen Motzfeldt mobil 562450 imaluunniit e-mail karm@nanoq.gl, imaluunniit Naalakkersuisumut allatsi Kirsten Enequist mobil 583754 imaluunniit e-mail kien@nanoq.gl.