Ilinniarnissamut qinnuteqarfissap killinga 1. marts

Ilinniarfinnut ingerlaqqiffiusunut ilinniagaqalerumalluni qinnuteqarnissamut martsip aallaqqaataa killingitinneqarpoq. Ilinniakkanut qinnuteqarnermi immersugassaq www.sullissivik.gl –ip nittartagaanut iserluni maanna immersorneqarsinnaalerpoq. Nunatsinni Danmarkimilu ilinniagaqarniarluni qinnuteqannginnermi eqqumaffigisassat piareersimaffigisassallu arlaqarput. Namminersorlutik Oqartussani Ilinniagaqarnersiuteqartitsinermut immikkoortortami pisortaq Guluk Chemnitz ilinniagaqarniarluni kiisalu ilinniagaqarnersiuteqarniarluni qinnuteqarnerit pillugit uani nassuiaasipparput.

Guluk Chemnitz: - Ilinniakkanut piareersaataasutut ilinniarfiusunut kiisalu ingerlaqqiffiusumik ilinniarfinnut qinnuteqartarneq martsip aallaqqaataanut killeqarpoq. Ilinniakkanut piareersaataasutut ilinniarfiit tassaapput GUX, HTX aamma HHX. Ingerlaqqiffiusunut ilinniarfiit tassaapput qiortartakkanik ingerlasut soorlu, Ilisimatusarfik, Ilinniartitsisunngorniarfik, Ilulissani Socialpædagogisk Seminaria allallu ingerlaqqiuffiusut.

Ilinniarfiit sorliit martsip aallaqqaataatinnagu qinnuteqarfigisariaqanngillat?

Guluk Chemnitz: - Inuussutissarsiutinut ilinniarfiit. Sanasunngorniat, innaallagisserisunngorniat allallu ilinniarnerat praktikkernermik aallarniuteqartarmat praktikkerfissaminnik nassaareersimagunik ilinnialerumallutik ukioq naallugu sukkulluunniit qinnuteqarsinnaapput.

Ilinniarnissamut qinnuteqalersinnani suut piareersimaffigisariaqarpat eqqumaffigisariaqarlutillu?

Guluk Chemnitz: - Ilinniarnissamut immersugassaq  www.sunngu.gl-ip nittartagaani aaneqarsinnaavoq, qinnuteqarnermi kuisinnermut allagartap aamma najugaqarnermut allagartap, meeraqaraannilu, meeqqanut tapinut qinnuteqassagaanni - meeqqat kuisinnermut najugaqarnermullu allagartaasa ilanngunneqarnissaat piumasaqaataapput. Qinnuteqaatit immersoriikkat najugarisami Piareersarfinnut tunniunneqassapput.

Ilinniagaqarnermi najugaqarnissaq pingaaruteqartuuvoq. Kalaallit Nunnaanni kiisalu Danmarkimi ilinniagaqartunut najugaqarnikkut atugassarititaasut assigiinngillat.

Guluk Chemnitz: - Taamaappoq. Kalaallit Nunaanni kollegiani ineqarnermut akiliut qaammammut 850 kr.-usoq Aningaasanut Inatsimmit aalajangersagaavoq. Danmarkimi ilinniarnermi inigisamut akiliutit tamakkiisut akilerneqartarput, taamaasilluni Danmarkimi ilinniartutut ineqarneq nunatsinnut naleqqiulluni akisunerujussuusinnaasarpoq.

Danmarkimi ineqarnerup tamakkiisumik nammineerluni akilersornissaa taamaammat eqqumaffigisariaqarpoq?

Guluk Chemnitz: - Ilumoorpoq, tamatuma saniatigut Danmarkimi kollegiami imaluunniit nalinginnaasumik inissiani inissamik nammineerluni ujaasillunilu qinnuteqartariaqarpoq. Danmarkimi Kalaallit Illuutaat pingasut kollegiaqarput, taakkua kikkunnut inissaqartitsisarnerat paasisaqarferusukkaanni nammineerluni saaffigisariaqarput. Nuummut ilinniariartut kollegiani inissamik tunineqartarput. Nuummi kollegiamik inissarsiortut nammineerlutik KAF-ip nittartagaanut www.kaf.gl –imut iserlutik qinnuteqassapput. KAF-imut nammineq saaffiginnilluni qinnuteqartarneq nutaajuvoq siornagummi kollegiani inissat ilinniarfinnut qinnuteqarnernut ilaatinneqartarmata. Nuummi GUX-imut qinnuteqarnermi kollegiami ineqartitaanissaq ilinniarnissamut qinnuteqaammi suli ilaavoq. Ilinniartut illoqarfigisaminni akilersukkaminnik najugaqareersimagunik najugartik qimallugu illoqarfimmi allami brancheskolerunik kollegiami najugaqarnermut akiliuteqartitaannginnissartik aamma qinnutigisinnaavaat. Ineqarnermut ilinniagaqalernissamullu tunngasut pillugit ilinniartunut siunnersortit oqaloqatiginiarneqarsinnaajuaannarput.

Nunatsinni Danmarkimilu ilinniagaqartut ilinniarnersiutaat aamma assigiinngillat?

Guluk Chemnitz: - Danmarkimi SU qaammammut 5700 kr.-uvoq nunatsinnilu qaammammut 4600 kr.-ulluni, inuussutissarsiutinut ilinniagaqartut qaammammut 4300 kr.-inik tapisisarput. Danmarkimi ilinniagaqarnersiutit annikitsumik aamma akileraaruteqartitaapput. Siornagut Danmarkimi ilinniagaqartut nunatsinni imaluunniit Danmarkimi atuuttunik ilinniagaqarnersiutinik pisartagaqarnissamut qinigassaqartarnikuupput, kisianni tamanna 2013-imi atorunnaarmat Danmarkimi ilinniagaqarnersiutit tamanut atuuttut, kalaallinut ilinniarfinni ingerlaqqiffiusuni kiisalu inuussutissarsiutinut ilinniartunut 20-nik ukioqalereersimasunut aamma atuutilerput. Kalaallit Danmarkimi ilinniartut 10.000 kr.-inik ataasiarlutik atornissamut periarfissaqarput. Taamaattoq ilinniakkamut nutaamut aallartinnermi nuunnermilu aningaasanik attartortoqaqqissinnaasarpoq. Immikkut tapiissutinik aamma qinnuteqartoqarsinnaavoq, aningaasat taakkua soorlu kigutileritinnermut, nakorsiarnermut kiisalu ukiumut ataasiarluni akiliutsilluni nunatsinnukartarnermut matussutaasarput. Aningaasat immikkut tapiissutit taakkua kalaallinut Danmarkimi ilinniagaqartunut ilinniagaqarnerat tamaat periarfissaasarput.

Danmarkimi ilinniagaqarnissamut qinnuteqalersinnani Kalaallit Illuutaannut attaveqaqqaarnissaq taamaammat pingaarutilipilussuuvoq?

Guluk Chemnitz: - Tassa suut piareersimaffigisassat eqqumaffigisassallu pillugit Kalaallit Illuarmiut siunnersuinissamut periarfissilluassagaanni sapinngisamik qinnuteqarfissaq sioqqutingaatsiarlugu saaffiginissaat pingaaruteqarpoq. Kalaallit Illuarmiut ukiut tamaasa nunatsinni ilinniarfinnut  assigiinngitsunut paasisitsiniaallutik angalatitsisarput. Paasisitsiniaagaangata Danmarkimi inuuniarnerup ilinniarnerullu akisusinnaassusia amerlasuut tupassutigisarpaat. Ilinnialersinnani aningaasanik katersilluaqqaannginneq akisuumik kinguneqarsinnaasarpoq. Ilinniartunut aningaasat ataasiartumik attartorneqarsinnaasut iluaqutaasaraluartut taamaattoq kisiisa isumalluutigissallugit naammattannginnerat Kalaallit Illuinit erseqqissaatigineqartuartarpoq.