Nipisanniarneq aallartingajalerpoq

Upernaleqimmat nipisanniarnissaq allartittussanngorpoq.
Nipisanniarneq februarip 29-annit juulip 15-iannut pissaaq.

Aalisartuuguit nipisanniarnissamut arlalinnik sianigisassariaqassaatit.

Nipisanniarnermi malittarisassat nutaat 2015-inimi atuutilerput.

Kitaata sineriaani aqutsiveqarfiit maannakkut arfineq marluussapput.
Aqutsiveqarfiit ataasiakkaarlugit pisassinneqassapput, taakkunani ulluni amerlanerpaani 47-ni aalisartoqarsinnaassalluni.

Aalisarneq kingusinnerpaamik ullut aalisarfiusut 47-t nallerneqarpata unitsinneqassaaq. Aqutsiveqarfimmut pisassiissutigineqartut ullut taakku nallertinnagit aalisarneqarpata aalisarneq unitsinneqassaaq.

Sumiiffinni aalisartut peqatigiiffiisa tunitsiviisalu isumaqatigiissutigissavaat aqutsiveqarfimmi aalisalernissaq qaqugu aallartinneqassanersoq.

Aalisalernissap aallartinneqarnissaata isumaqatigiissutigineqarnerani pingaartinneqarluni sianigineqassaaq aalisarneq aallartinneqassammat suaat aatsaat inerissimalerpata.

Ulloq aqutsiveqarfimmi tunisisinnaalernissap aallartinneqarnissaanut kissaatigineqartoq Naalakkersuisoqarfimmut ilisimatitsissutigineqassaaq, Naalakkersuisoqarfimmit tusagassiuutinut kingorna nalunaarutigineqassalluni aalisalernissap aallartiffissaa.

Nipisanniarsinnaanermut akuersissuteqartoqassaaq, akuersissut qinnutigineqarsinnaalluni. Akuersissut aqutsiveqarfinnut tamanut atuuppoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl

Kitaani aqutsiveqarfiit titartagaanerat allaaserineqarnerallu uani atuarsinnaavatit.