Aaqqissuussaanermut Isumalioqatigiissitap isumaliutissiissutaani periutsit aalajangiusimaneqarput

Naalakkersuinikkut Ataqatigiissaarisoqatigiit (KANUKOKA, borgmesterit sisamat aamma Naalakkersuisut) pisortat ingerlatsinerisa aaqqissuussaanerat ingerlaavartumik oqallisigisarsimavaat. Kingullermi 16. februar 2016-imi ataatsimiinnerminni.

Aaqqissuussaanerup iluarsartuuteqqinnera pillugu oqallinnermut atatillugu isumaqatigiissutigineqarpoq nunatsinni ajornartorsiutit unammilligassallu aaqqiivigineqartariaqartut kommunit Namminersorlutillu Oqartussat akornanni qanimut suleqatigiissutigineqassasoq, tassungalu atatillugu Qaasuitsup Kommunianit avitsisinnaanissaq ilaatigut oqallisigineqarluni.

Naalakkersuinikkut Ataqatigiissaarisoqatigiit Aaqqissuussaanermut Isumalioqatigiissitap isumaliutissiissutaani anguniagassatut, periusissatut aamma tunngaviusumik naatsorsuutigisatut siunnersuutigineqarsimasut aalajangiussimaneqassasut ilaatigut aalajangiuppaat, ilaatigullu missingersuusiortarneq pillugu suleqatigiinnissamut isumaqatigiissummi immikkoortortat pingaarnerit, taakku  pisortat aaqqissuussaanerisa aaqqissugaanerini  suleriaqqinnissamut tunngaviusut. Kommuninut suliassanik aalajangersimasumik nuussisarnissat suliarineqassasut erseqqissaatigineqarpoq, taamatullu sulineq 2016-ip ingerlanerani aalajangersimasumik suliniutinut siunnersuutitut piviusunngortinneqassasoq.

Naalakkersuinikkut Ataqatigiissaarisoqatigiit aamma oqallisigaat, qanoq iliorluni oqartussaaqa-taaneq najukkani nukittorsarneqarsinnaanersoq. Suliniutit assigiinngitsut suliarineqassasut isumaqatigiissutigineqarpoq, taamaasilluni innuttaasut oqartussaaqataanermik sulinernut peqataanermut periarfissaat nukittorsarneqarlutik.

16. februaarimi ataatsimiinnermi siunissami kommunit aaqqissugaanissaat pisortallu ingerlatsiviata aaqqissugaanera oqallisigineqarput. Nalilersuinermik sulineq ingerlanneqarsimavoq, nalilersuinerit naatsorsuinerillu takutippaat kommunimik ataatsimik imaluunniit kommuninik arlalinnik avitsinissat nunamut tamarmut eqquissasut assorsuarlu akisussalluni. Aalajangiisoqannginnerani kingunerisin-naasat tamarmik qulaajarneqassasut isumaqatigiissutigineqarpoq. 

- Qaasuitsup Kommunianit avitsinnissaq pillugu inunnik taasisitsinissaq sioqqullugu innuttaasut ani-ngaasaqarnikkut kingunerisinnaasaat pillugit paasitinneqarsimanngillat. Innuttaasunut kommunip avinneqannginnerani kingunerisinnaasanik ilisimatinneqartariaqartut Naalakkersuisut isumaqarput.  Kommuninik A, B imaluunniit C-nik pilersitsissanngikkutta allatut ajornartumik, Aaqqissuussaanermut Isumalioqatigiissitamit 2005-imi naliliivigineqarsimasutut kommuneqartariaqarpugut suliassanik naammassinnissinnaanissanik pitsaasumik piumasaqaatinut kivitsisinnaasunik. Aammaarlunga erseqqissaatigissavara, pingaarnerunngimmat innuttaasut Namminersorlutik Oqartussanit imaluunniit kommuninit sullissinermik isumaginnittuuppata, pingaarnerpaavorli innuttaasunut pitsaanerpaamik pimoorussinerpaamillu sullissineq angusinnaassagutsigu, Naalakkersuisunut Siulittaasoq Kim Kielsen taama oqarpoq.

Nunaqarfinni siulersuisut peqatigiiffiat KANUNUPE ataatsimiinnermi alaatsinaattutut ilaavoq.

 

Nuuk, ulloq 22. februar 2016                                                                                                                                    

Kim Kielsen, Naalakkersuisut Siulittaasuat                                                                                                             Palle Jerimiassen, KANUKOKA-p Siulittaasua

Jørgen W. Johansen, Kommune Kujalleq-mi borgmesteri

Asii C. Narup, Kommuneqarfik Sermersuumi borgmesteri

Hermann Berthelsen, Qeqqata Kommuniani borgmesteri

Ole Dorph, Qaasuitsup Kommuniani borgmesteri

 

 

Attavissaq: Nunami Namminermi Pissutsinut Allaffeqarfimmi pisortaq Martha Abelsen tlf. 34 51 11 maab@nanoq.gl