Sunngiffimmi aalisartunut saarulliit 1000 tonsit qaleraliillu 100 tonsit

Stemningsbillede

Sunngiffimmi aalisartut saarulliit 1000 tonsit qaleraliillu qullukkiassat 100 tonsit aqutsiveqarfinni pingasuni 2016-imi tunisinnaavaat.

Naalakkersuisut aalajangerput nunatsinni sunngiffimmi aalisartut saarullinnik 1.000 tonsinik 2016-imi tunisisinnaanissaannut periarfissinneqassasut. Naalakkersuisut aamma aalajangerpaat sunngiffimmi aalisartut aqutsiveqarfinni Upernavimmi, Uummannami aamma Qeqertarsuup Tunuani qaleralinnik 100 tonsinik tunisisinnaassasut.

Tunisisinnaanissamut immersuiffissap Aalisarnermut, Piniarnermut Nunalerinermullu Naalakkersuisoqarfimmut immersoriarlugu nassiunneqarnissaa pisariaqarpoq, sunngiffimmi aalisartoq, qinnuteqartoq Naalakkersuisoqarfimmit akuersissummik kingorna nassinneqassalluni.
Tunisisinnaanissamut uku piumasaqaataapput:

  • Qinnuteqartoq nunatsinni inuit allattorsimaffianni nalunaarsimassaaq, ukiut kingulliit marluk nalunaarsimassalluni
  • Qinnuteqartoq nunatsinnut akileraartartuussaaq nunatsinnut ukiuni kingullerni marlunni, januaarimit decembarimut, akileraartarsimassalluni
  • Qinnuteqartoq inuussutissarsiutigalugu aalisartuussaanngilaq

Tunitsiviup sunngiffimmi aalisartut tulaassaasa pisarinissaannut itigartitsissutigisinnaavai aalisakkat inuussutissarsiutigalugu aalisartut tulaassaannut piumasaqaatigineqartut tunngavigalugit suliarineqarsimanngippata.

Tunisat inuussutissarsiutigalugu aalisartunut killilersorneqalerpata, tunitsiviit sunngiffimmi aalisartut tulaassaasa pisiarinissaannut aamma itigartitsissuteqarsinnaapput.

Aalisakkat pisassiissutigineqartut tamakkerlugit aalisarneqarsimasutut nalunaarutigineqarpata, tunisineq unitsinneqassaaq.

Sunngiffimmi aalisartup isertitani nammineerluni Akileraartarnermut Aqutsisoqarfimmut nalunaarutigissallugit akisussaaffigivai.
Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum. Mail: jool@nanoq.gl

Qinnuteqarfissaq uani pineqarsinnaavoq.