Suleqatiginnikkusuppugut

Suliassatigut aammalu paasisassatigut pissarsiaqarfiulluartumik Danmark-imut isumaginninnikkut politikerit 19-t atorfilittallu 5-t kommuninit sisamaneersut angalaqatigiissimanerat naammassineqaqqammerpoq.

Assigiinngitsunut paasisassarsioqatigiinnermi takusarneqarput isumaginninnikkut iliuuseqaatsit nutaajusut, atortorissaarutit nutaaliaanerpaat atorlugit atugarissaarnermut innarluutilinnillu sullissinermi periarfissiissutigineqartut takusarneqarsimapput, pulaarneqarnerallu peqataasunut annertuumik eqiiallattitsillunilu nutaamik isiginnilersittisimallutik. Angalaqatigiit ilaatigut periarfissinneqarput takussallugit paasisaqarfigissallugillu:

Qanoq sanaartornerni akisunerulersitsinngikkaluarluni takorluuinnittoqarsinnaanersoq ”Assigiinngisitaarnitta tutsuiginartuutinnissaani” aammalu ”Isumaginnikkut akuutitsiniarnerit” eqqarsaatigalugit.

Qanoq tarnikkut timikkullu innarluutilinnut inissiassat pisatsersornissaat aaqqissuussiffigineqarsinnaappat, tassuunatigullu aqqutissiuullugu nammineersinnaanerulernissaq inuummarinnerulerlunilu inuusaaseqalernissaq?
Isumaginninnerup iluani paasisat nutaat suuppat, tamatumani meeqqanik utoqqarnillu paaqqutarinnittarnerit eqqarsaatigalugit?
Qanoq periuseqarluni innuttaasut ilaqutariissuttitigut ingerlanerminni atornerluinerit pinerluuteqarnerillu nalinginnaasuuffiini inooqataasuni qanilaarnerusumik sulissussisinnaanissaq aqqutissiuuneqarsinnaava?
Tarnip pissusaannik atornerluinernillu katsorsaasarnerni misilittakkat nutaat suuppat?

Minnerunngitsumillu – qanoq periuseqarluni Herning Kommune ”Sverigimi periuserineqartoq” atuutilersinneqarsinnaasimava, tamatumani isumaginnittoqarfinni sullissisut oqilisaavigineqarnissaat siunertaralugu?

Taamaasillutik peqataasut nutaanik paasisimasaqalerput aammalu isummersuutinik siunissami politikkikkut suliariaqqinnissaminnut atatillugu tuniorarneqarlutik.

Martha Lund Olsen imatut oqarpoq: ” Angalaqatigiinneq tamakkerlugu angusaqarfiulluartumik suleqatigiittariaqarnermik anersaaqarluni ingerlasimavoq, isumaqatigiissutigineqarlunilu makkua tungaasigut suleqatigiittoqartariaqartoq:

- Danmark-imi innarluutiliutitta nunatsinnut angerlartinniarnissaat
- Isumaginninnikkut aqutsisoqarfimmik pilersitsineq
- Meeqqat angerlarsimaffiup avataannut inissinneqartartut ikilisarniarneqarnissaat.”

Paasisaqarnerorusuttut attavigisinnaavaat Naalakkersuisumut allatsi Hanne Nielsen, mobil +299 539371 imaluunniit e-mail hani@nanoq.gl